រាជធានីភ្នំពេញ៖ នៅព្រឹកថ្ងៃទី២៦ ខែតុលា ឆ្នាំ២០២៦ ឯកឧត្តម ប៉ាក់ សុខុម រដ្ឋលេខាធិការ និងជាប្រធានគណៈកម្មការគ្រប់គ្រងហូកា នៃក្រសួងទេសចរណ៍ លោកបណ្ឌិត Daniel Nugraha នាយកប្រចាំប្រទេសរបស់អង្គការស្វីសខន់ថាក់ រួមជាមួយ លោកស្រី សារឿន លក្ខិណា ប្រធានសម្របសម្រួលថ្នាក់ជាតិ នៃទីភ្នាក់ងារលីចតេស្ទីន អញ្ជើញជាអធិបតីចូលរួមពិធីបើក “ទិវាជំនាញ ហូកា ឆ្នាំ២០២៦ - HoKa Skills Day 2026” ក្រោមប្រធានបទ៖ ជំនាញសម្រាប់អនាគតរួមគ្នា “ពង្រឹងសមត្ថភាពអ្នកជំនាញទេសចរណ៍តាមការសិក្សាពេញមួយជីវិត” នៅសណ្ឋាគារ រ៉េស៊ីដង់សុខា ភ្នំពេញ។
ក្នុងពិធីនេះផងដែរក៏មានការអញ្ចើញចូលរួមពី ឯកឧត្តម លោកជំទាវ ថ្នាក់ដឹកនាំក្រសួងទេសចរណ៍ តំណាងក្រសួងការងារ និងបណ្តុះបណ្តាលជំនាញវិជ្ជាជីវៈ ឯកឧត្តម លោកជំទាវ អភិបាលរងរាជធានី-ខេត្ត លោក លោកស្រី វាគ្មិនកិត្តិយស មន្រ្តីរាជការក្រសួងទេសចរណ៍ ថ្នាក់ដឹកនាំ និងមន្រ្តីរាការមន្ទីរទេសចរណ៍រាជធានី-ខេត្ត តំណាងសាលាបណ្តុះបណ្តាលជំនាញវិជ្ជាជីវៈទេសចរណ៍ គ្រូបង្គោលអាស៊ាន និងអ្នកវាយបង្គោលអាស៊ាន ក្រុមការងារអង្គការស្វើសខន់ថាក់ តំណាងសមាគមឧស្សាកម្មទេសចរណ៍ និងមូលដ្ឋានអាជីវកម្មទេសចរណ៍ សរុបប្រមាណ ៣៥០នាក់។
ថ្លែងក្នុងពិធីបើក ឯកឧត្តមរដ្ឋលេខាធិការ បានមានប្រសាសន៍ថាគណៈកម្មការគ្រប់គ្រងគម្រោង ហូកា ត្រូវបានបង្កើតឡើងនៅថ្ងៃទី១៤ ខែសីហា ឆ្នាំ២០២០ ស្របតាមស្មារតីនៃអនុសារណៈនៃការយោគយល់គ្នារវាងក្រសួងទេសចរណ៍ និងអង្គការ Swisscontact ថ្ងៃទី០៥ ខែសីហា ឆ្នាំ២០២០ ហើយគណៈកម្មការគ្រប់គ្រងគម្រោង ហូកា បានបន្តអនុវត្តគម្រោងដំណាក់កាលទី៣ ឆ្នាំ២០២៤-២០២៨ ក្រោយពិធី “ប្រកាសដាក់ឱ្យដំណើរការជាផ្លូវការកម្មវិធីអភិវឌ្ឍន៍ជំនាញដំណាក់កាលទី៣ ឆ្នាំ២០២៤-២០២៨” កាលពីថ្ងៃទី៩ ខែធ្នូ ឆ្នាំ២០២៤ ក្រោមធិបតីភាពដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយ លោក Reto Grueninger នាយកទីភ្នាក់ងារស្វីសម្រាប់ការអភិវឌ្ឍន៍ និងសហប្រតិបត្តិការ (SDC) និងលោក Pius Frick តំណាងភ្នាក់ងារលីចតេស្ទីន (LED)។
ក្រសួងទេសចរណ៍បានយកចិត្តទុកដាក់ខ្ពស់លើការអប់រំបណ្តុះបណ្តាល និងអភិវឌ្ឍធនធានមនុស្សក្នុងវិស័យទេសចរណ៍ ដោយបានដាក់ចុះនូវយុទ្ធនាការ “បុគ្គលិកម្នាក់ជំនាញមួយ (One Employee, One Skill)” ដែលមានបញ្ជូលក្នុងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ដោយផ្តោតលើទាំងបរិមាណ និងគុណភាព ដើម្បីឆ្លើយតបទៅនឹងតម្រូវការនៃការអភិវឌ្ឍន៍វិស័យទេសចរណ៍។ ចូលរួមចំណែកដល់យុទ្ធសាស្ត្រខាងលើ គណៈកម្មការគ្រប់គ្រងគម្រោង ហូកា ក៏កំពុងរៀបចំផែនទីបង្ហាញផ្លូវការបណ្តុះបណ្តាល ហូកា (HoKa Roadmap) ២០២៤-២០២៨ ដើម្បីជាចលករចូលរួមសំខាន់ក្នុងការលើកកម្ពស់ជំនាញវិជ្ជាជីវៈ ដោយផ្តោតលើកម្មវិធីអាទិភាពចំនួន ៦ រួមមាន៖ (១) ការវិភាគតម្រូវការជំនាញ និងកម្លាំងពលកម្មក្នុងវិស័យទេសចរណ៍ (២) ជំរុញការបណ្តុះបណ្តាល និងកម្មវិធីបណ្តុះបណ្តាលឆ្លើយតបទៅនឹងទីផ្សារការងារ (៣) លើកកម្ពស់គុណភាពការបណ្តុះបណ្តាល និងបណ្តុះបណ្តាលគ្រូ (៤) ជំរុញភាពជាដៃគូរជាមួយវិស័យឯកជន និងដៃគូរពាក់ព័ន្ធ (៥) ផ្សព្វផ្សាយជំនាញវិជ្ជាជីវៈដល់ស្រទាប់យុវជន និង(៦) កសាងគុណវុឌ្ឍិជាតិវិជ្ជាជីវៈទេសចរណ៍។
គួរបញ្ជាក់ផងដែរថាក្រសួងទេសចរណ៍កំពុងជំរុញការភ្ជាប់ពីកម្មវិធីបណ្តុះបណ្តាលហូកា (HoKa) ទៅក្របខណ្ឌគុណវុឌ្ឍិជាតិកម្ពុជា (Cambodia Qualifications Framework) ដើម្បីឱ្យជំនាញ និងសមត្ថភាពដែលបុគ្គលទទួលបានតាមរយៈការបណ្តុះបណ្តាល និងបទពិសោធន៍ការងារ អាចទទួលបានការទទួលស្គាល់ជាផ្លូវការ។
