ខេត្តសៀមរាប៖ ចាប់ពីថ្ងៃទី១១-១៦ ខែកញ្ញា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងការណែនាំបន្ថែមពីលោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាប្រធានលេខាធិការដ្ឋាន គ.គ.ហ. លោក សុគន្ធ ភូវនាថ មន្រ្តីនៃនាយកដ្ឋានបានបញ្ចប់ដោយជោគជ័យកម្មវិធីហាត់ការវិជ្ជាជីវៈតាមមូលដ្ឋានអាជីវកម្ម ផ្នែកចុងភៅ នៅសណ្ឋាគារ PARK HYATT SIEM REAP ខេត្តសៀមរាប។
ក្នុងអំឡុងពេលហាត់ការ លោក បានសិក្សាស្វែងយល់ពី រចនាសម្ព័ន្ធ និងប្រព័ន្ធប្រតិបត្តិការរបស់ផ្នែកចុងភៅ ការរៀបចំតំបន់ការងារ និងឧបករណ៍ផ្ទះបាយ ការរៀបចំ និងត្រួតពិនិត្យវត្ថុធាតុដើម ការរៀបចំគ្រឿងផ្សំ (Mise en Place) បច្ចេកទេសចម្អិនអាហារ ការរៀបចំ និងបង្ហាញម្ហូប (Food Preparation & Presentation) ព្រមទាំងការអនុវត្ត អនាម័យ និងសុវត្ថិភាពចំណីអាហារ តាមនីតិវិធីប្រតិបត្តិស្តង់ដារ (SOPs)។
ជាពិសេស លោក បានពង្រឹងចំណេះដឹងអំពី ការគ្រប់គ្រងសុវត្ថិភាពចំណីអាហារតាមគោលការណ៍ស្តង់ដាអន្តរជាតិ ដោយផ្តោតលើការគ្រប់គ្រងហានិភ័យចាប់ពីការទទួលវត្ថុធាតុដើម ការត្រួតពិនិត្យគុណភាព និងសីតុណ្ហភាព ការរក្សាទុក ការរៀបចំ ការចម្អិន រហូតដល់ការផ្តល់ជូនភ្ញៀវ។
បន្ថែមពីនេះ លោក ក៏បានសិក្សាអំពី ការគ្រប់គ្រងស្តុកតាមគោលការណ៍ FIFO/FEFO ការដាក់ស្លាក និងកំណត់អត្តសញ្ញាណវត្ថុធាតុដើម ការបែងចែកវត្ថុធាតុដើមឆៅ និងអាហារឆ្អិន ការគ្រប់គ្រងកាកសំណល់ ការសម្អាត និងសម្លាប់មេរោគឧបករណ៍ ព្រមទាំងការរៀបចំឯកសារ និងកំណត់ត្រាដែលជាផ្នែកសំខាន់សម្រាប់ការធានាគុណភាព និងសុវត្ថិភាពចំណីអាហារ។
ក្រោយបញ្ចប់កម្មវិធី ចំណេះដឹង និងបទពិសោធន៍ដែលទទួលបានពីការអនុវត្តជាក់ស្តែង នឹងអាចយកទៅប្រើប្រាស់ក្នុងការងារ ជាពិសេសក្នុងការចូលរួម ពង្រឹង និងអភិវឌ្ឍការបណ្តុះបណ្តាលជំនាញចុងភៅ ដោយភ្ជាប់ចំណេះដឹងទ្រឹស្តីទៅនឹងការអនុវត្តជាក់ស្តែង និងគោលការណ៍សុវត្ថិភាពចំណីអាហារតាមស្តង់ដារអន្តរជាតិ ព្រមទាំងចែករំលែកបទពិសោធន៍ និងចំណេះដឹងថ្មីៗទៅកាន់មន្ត្រី សិក្ខាកាម និងអ្នកជំនាញទេសចរណ៍។
ការចុះហាត់ការនេះ គឺជាផ្នែកមួយនៃការពង្រឹង សមត្ថភាពមន្ត្រី និងធនធានមនុស្សទេសចរណ៍ តាមរយៈការរៀនសូត្រពីបរិយាកាសការងារជាក់ស្តែង ការអនុវត្តនីតិវិធីប្រតិបត្តិស្តង់ដារ និងការយកចិត្តទុកដាក់លើគុណភាព និងសុវត្ថិភាពចំណីអាហារ ដើម្បីរួមចំណែកលើកកម្ពស់គុណភាពសេវាកម្ម និងសមត្ថភាពវិជ្ជាជីវៈក្នុងវិស័យទេសចរណ៍ និងបដិសណ្ឋារកិច្ចកម្ពុជាឱ្យកាន់តែប្រសើរ។
