រាជធានីភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍បានអញ្ចើញផ្តល់កិត្តិយសដ៏ខ្ពង់ខ្ពស់ ចែកជូនវិញ្ញាបនបត្របន្តទទួលស្គាល់សាលាបណ្ដុះបណ្ដាលជំនាញវិជ្ជាជីវៈទេសចរណ៍ទាំងពីរ ក្នុង «សិក្ខាសាលាផ្សព្វផ្សាយជំនាញវិជ្ជាជីវៈទេសចរណ៍ អមដោយពិធីប្រគល់វិញ្ញាបនបត្រដល់សិក្ខាកាមវគ្គបណ្តុះបណ្តាលគ្រូបង្គោលជាតិ និងអ្នកវាយតម្លៃបង្គោលជាតិ នៃសេវាកម្មសណ្ឋាគារ ស្របតាមស្តង់ដាអាស៊ាន (ASEAN MRA-TP) ឆ្នាំ២០២៦» នៅទីស្តីការក្រសួងទេសចរណ៍។
ការទទួលស្គាល់ជាផ្លូវការនេះ គឺជាសក្ខីភាពបង្ហាញពីការខិតខំប្រឹងប្រែង និងការប្តេជ្ញាចិត្តរបស់សាលាបណ្តុះបណ្តាលជំនាញវិជ្ជាជីវៈទាំងពីរ ក្នុងការអនុវត្តតាមគោលការណ៍ លក្ខខណ្ឌ និងស្តង់ដារបណ្តុះបណ្តាលដែលកំណត់ដោយក្រសួងទេសចរណ៍ សំដៅធានាបាននូវគុណភាព ប្រសិទ្ធភាព និងភាពជឿទុកចិត្តនៃការបណ្តុះបណ្តាលជំនាញវិជ្ជាជីវៈទេសចរណ៍។
ជាមួយគ្នានេះ ការអនុញ្ញាតឱ្យសាលាទាំងពីរដំណើរការជាសាលាបណ្តុះបណ្តាលជំនាញវិជ្ជាជីវៈទេសចរណ៍ ក៏ជាការបង្ហាញពីកិច្ចសហការដ៏មានសារៈសំខាន់រវាង ក្រសួងទេសចរណ៍ និងវិស័យឯកជន ក្នុងការរួមគ្នាអភិវឌ្ឍធនធានមនុស្សក្នុងវិស័យទេសចរណ៍ និងបដិសណ្ឋារកិច្ច។ តាមរយៈការចូលរួមរបស់សាលាបណ្តុះបណ្តាលឯកជន នឹងជួយពង្រីកឱកាសទទួលបានការបណ្តុះបណ្តាលជំនាញប្រកបដោយគុណភាព សម្រាប់យុវជន និងអ្នកកំពុងបម្រើការងារក្នុងវិស័យទេសចរណ៍។
