ខេត្តសៀមរាប៖ នៅរសៀលថ្ងៃទី២ ខែកញ្ញា ឆ្នាំ២០២៦ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានអញ្ជើញជាអធិបតីក្នុងសិក្ខាសាលា ស្តីពី «ការផ្សព្វផ្សាយការអភិវឌ្ឍសេដ្ឋកិច្ចក្រៅប្រព័ន្ធ ការអភិវឌ្ឍជំនាញវិជ្ជាជីវៈ និងការពង្រឹងគុណភាពសេវាកម្មក្នុងវិស័យទេសចរណ៍» ដើម្បីជំរុញការអនុវត្តយុទ្ធសាស្រ្តជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ ដែលមានបងប្អូនអ្នកសេដ្ឋកិច្ចក្រៅប្រព័ន្ធចូលរួមប្រមាណជាង ៣៥០០នាក់។
ក្នុងឱកាសនោះ ក្រុមការងារនៃ នាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ ដឹកនាំដោយ លោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាប្រធានលេខាធិការដ្ឋាន គ.គ.ហ. បានចូលរួមដាក់តាំងបង្ហាញសមិទ្ធផលការងាររបស់នាយកដ្ឋាន សមិទ្ធផលការងាររបស់គម្រោង HoKa ព្រមទាំងសៀវភៅ និងឯកសារណែនាំអំពីជំនាញវិជ្ជាជីវៈទេសចរណ៍ផ្សេងៗ ដើម្បីផ្សព្វផ្សាយ និងបង្ហាញអំពីឱកាសនៃការអភិវឌ្ឍជំនាញជូនដល់អ្នកប្រកបរបរសេដ្ឋកិច្ចក្រៅប្រព័ន្ធក្នុងវិស័យទេសចរណ៍។
លោកបណ្ឌិតប្រធាននាយកដ្ឋានក៏បានចូលរួមធ្វើបទបង្ហាញពីសេចក្តីព្រាងកម្មវិធីបណ្តុះបណ្តាលជំនាញសម្រាប់បងប្អូនក្នុងសេដ្ឋកិច្ចក្រៅប្រព័ន្ធ ចំនួន ៧កម្មវិធី ដែលរៀបចំឡើងក្រោមកិច្ចសហការរវាងនាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ ជាមួយ វិទ្យាស្ថានអាជីវកម្មអន្តរជាតិ និង មូលនិធិអភិវឌ្ឍន៍ជំនាញ (Skills Development Fund) រួមមាន៖
១. ជំនាញបដិសណ្ឋារកិច្ចសម្រាប់អ្នកប្រកបអាជីវកម្មក្នុងសេដ្ឋកិច្ចក្រៅប្រព័ន្ធ
២. ជំនាញការិយាល័យជួរមុខ (Front Office)
៣. ជំនាញចុងភៅ (Cook/Chef)
៤. ជំនាញឆុងកាហ្វេ (Barista)
៥. ជំនាញគេហកិច្ច (Housekeeping)
៦. ជំនាញសេវាកម្មម្ហូបអាហារ និងភេសជ្ជៈ (Food & Beverage Service) និង
៧. ជំនាញភាពជាអ្នកដឹកនាំ (Leadership)។
កម្មវិធីបណ្តុះបណ្តាលទាំង ៧នេះ ត្រូវបានរៀបចំឡើងសម្រាប់អនុវត្តជាគម្រោងសាកល្បងនៅតំបន់គោលដៅចំនួន ៤ រួមមាន រាជធានីភ្នំពេញ ខេត្តកំពង់ធំ ខេត្តកំពត និងខេត្តសៀមរាប ដោយផ្តោតលើការពង្រឹងសមត្ថភាពជំនាញវិជ្ជាជីវៈ ការលើកកម្ពស់គុណភាពសេវាកម្ម និងការបង្កើនឱកាសទទួលបានការងារ និងប្រាក់ចំណូលប្រកបដោយចីរភាពសម្រាប់អ្នកប្រកបរបរក្នុងសេដ្ឋកិច្ចក្រៅប្រព័ន្ធ។
