ខេត្តសៀមរាប៖ នៅព្រឹកថ្ងៃទី១៩ ខែតុលា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ឯកឧត្តម ឈុន មករា អគ្គនាយកគ្រប់គ្រងឧស្សាហកម្មទេសចរណ៍ អមដំណើរដោយលោកបណ្ឌិតប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងមន្ត្រីជំនាញនៃនាយកដ្ឋាន បានចុះបំពេញទស្សនកិច្ចនៅសាលាបណ្តុះបណ្តាលវិជ្ជាជីវៈទេសចរណ៍ នៃអង្គការស្លាបព្រាកម្ពុជា (Spoons Cambodia Organization) ដើម្បីពិនិត្យអំពីការអនុវត្តរបស់សាលាស្របតាមលិខិតបទដ្ឋានគតិយុត្តដែលដាក់ចេញដោយក្រសួងទេសចរណ៍ និងទាំងសម្បទារូបវន្ត ហេដ្ឋារចនាសម្ព័ន្ធគ្រប់គ្រងរបស់សាលា។
ជាមួយគ្នានេះ ឯកឧត្តមអគ្គនាយក បានថ្លែងអំណរគុណ និងកោតសរសើរចំពោះថ្នាក់ដឹកនាំ លោកគ្រូ អ្នកគ្រូ និងបុគ្គលិកនៃសាលាបណ្តុះបណ្តាលវិជ្ជាជីវៈទេសចរណ៍ នៃអង្គការស្លាបព្រាកម្ពុជា ដែលបានខិតខំប្រឹងប្រែងចូលរួមចំណែកក្នុងការបណ្តុះបណ្តាល និងអភិវឌ្ឍជំនាញវិជ្ជាជីវៈដល់យុវជន ដើម្បីបង្កើនឱកាសទទួលបានការងារ និងលើកកម្ពស់ជីវភាពរស់នៅ។ ទន្ទឹមនឹងនេះ ឯកឧត្តមអគ្គនាយក ក៏បានលើកទឹកចិត្តដល់ថ្នាក់ដឹកនាំ និងបុគ្គលិកសាលាទាំងអស់ឱ្យបន្តខិតខំប្រឹងប្រែងពង្រឹងគុណភាពនៃការបណ្តុះបណ្តាល ធ្វើបច្ចុប្បន្នភាពកម្មវិធីសិក្សាឱ្យស្របតាមតម្រូវការទីផ្សារការងារ បន្តកែលម្អសម្បទារូបវន្ត និងហេដ្ឋារចនាសម្ព័ន្ធ ព្រមទាំងពង្រឹងកិច្ចសហការជាមួយក្រសួងទេសចរណ៍ និងដៃគូពាក់ព័ន្ធ ដើម្បីរួមគ្នាអភិវឌ្ឍធនធានមនុស្សក្នុងវិស័យទេសចរណ៍ឱ្យមានសមត្ថភាព ជំនាញវិជ្ជាជីវៈ និងសីលធម៌ការងារខ្ពស់ សំដៅរួមចំណែកដល់ការលើកកម្ពស់គុណភាពសេវាកម្មទេសចរណ៍ និងការអភិវឌ្ឍវិស័យទេសចរណ៍កម្ពុជាប្រកបដោយចីរភាព។
សូមជម្រាបជូនថា ក្នុងឆ្នាំសិក្សា ២០២៥-២០២៦ នេះ ដែលជាជំនាន់ទី៥ អង្គការស្លាបព្រាកម្ពុជា បានផ្តល់អាហារូបករណ៍ដល់យុវជនមកពីគ្រួសារខ្វះខាតចំនួន ៨០នាក់ ឱ្យទទួលបានឱកាសសិក្សាក្នុងវគ្គបណ្តុះបណ្តាលជំនាញសេវាកម្មម្ហូបអាហារ និងភេសជ្ជៈ ជំនាញចុងភៅ ជំនាញដុតនំ និងធ្វើបង្អែម និងជំនាញឆុងកាហ្វេ ដើម្បីទទួលបានចំណេះដឹង និងជំនាញពិតប្រាកដ សម្រាប់កសាងអនាគតដ៏រុងរឿងនាពេលខាងមុខ។
