ខេត្តសៀមរាប៖ នៅព្រឹកថ្ងៃទី២០ ខែតុលា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ឯកឧត្តម ឈុន មករា អគ្គនាយកគ្រប់គ្រងឧស្សាហកម្មទេសចរណ៍ អមដំណើរដោយលោកបណ្ឌិតប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងមន្ត្រីជំនាញនៃនាយកដ្ឋាន បានចុះបំពេញទស្សនកិច្ចនៅសាលាសណ្ឋាគារ និងទេសចរណ៍ ប៉ូល ឌុយប្រ៊ូល (Paul Dubrule School of Hospitality and Tourism) ដើម្បីចុះតាមដានត្រួតពិនិត្យ និវឌ្ឍនភាព និងទិសដៅអភិវឌ្ឍកម្មវិធីបណ្តុះបណ្តាលដែលទទួលស្គាល់ដោយក្រសួងទេសចរណ៍។
ក្នុងជំនួបពិភាក្សានេះ ឯកឧត្តមអគ្គនាយក បានថ្លែងអំណរគុណ និងកោតសរសើរចំពោះសាលាដែលបានចូលរួមអភិវឌ្ឍន៍ធនធានមនុស្សជំម្រុញការបណ្តុះបណ្តាលឱ្យមានសមត្ថភាព
និងគុណភាពតាមរយៈកម្មវិធីបណ្តុះបណ្តាលអាស៊ាន MRA-TP ស្របតាមស្តង់ដាជាតិ និងអន្តរជាតិ។ ឯកឧត្តមក៏បានលើកទឹកចិត្តឱ្យបន្តពង្រឹងកិច្ចសហប្រតិបត្តិការជាមួយក្រសួងទេសចរណ៍ ក្នុងការអភិវឌ្ឍកម្មវិធីសិក្សា ការបណ្តុះបណ្តាលគ្រូបង្គោល ការវាយតម្លៃសមត្ថភាព និងការភ្ជាប់និស្សិតទៅកាន់ឱកាសការងារជាក់ស្តែង ដើម្បីរួមចំណែកលើកកម្ពស់គុណភាពសេវាកម្មទេសចរណ៍ និងពង្រឹងភាពប្រកួតប្រជែងរបស់កម្ពុជាលើទីផ្សារទេសចរណ៍ក្នុងតំបន់ និងពិភពលោក។
គួរបញ្ជាក់ផងដែរថា សាលាសណ្ឋាគារ និងទេសចរណ៍ ប៉ូល ឌុយប្រ៊ូល (Paul Dubrule School of Hospitality and Tourism) គឺជាសាលាដំបូងគេនៅខេត្តសៀមរាប ដែលបានអនុវត្តកម្មវិធីស្តង់ដាសមត្ថភាពអាស៊ាន (MRA-TP)។ កន្លងមក សាលាបានបញ្ជូនសិស្សឱ្យចូលរួមប្រកួតប្រជែងក្នុងកម្មវិធីជំនាញអាស៊ាន (ASEAN Skills Competition) និងទទួលបានលទ្ធផលគួរជាទីមោទនៈ។
សម្រាប់ឆ្នាំ២០២៦ សាលាបានបណ្តុះបណ្តាលសិស្សសរុបចំនួន ៣១៩នាក់ ក្នុងនោះមានសិស្សស្រី ២២៧នាក់ លើជំនាញសំខាន់ៗចំនួន ៧ រួមមាន៖
១. ជំនាញគ្រប់គ្រងបដិសណ្ឋារកិច្ច
២. ជំនាញប្រតិបត្តិការទីភ្នាក់ងារទេសចរណ៍
៣. ជំនាញសេវាកម្មភ្ញៀវ (ការិយាល័យជួរមុខ និងគេហកិច្ច)
៤. ជំនាញសេវាកម្មម្ហូបអាហារ និងភេសជ្ជៈ
៥. ជំនាញចម្អិនម្ហូបអាហារ
៦. ជំនាញធ្វើនំ
៧. ថ្នាក់ត្រៀមបដិសណ្ឋារកិច្ច។
ជំនួបនេះបានបង្ហាញពីការប្តេជ្ញាចិត្តរួមរវាងក្រសួងទេសចរណ៍ និងសាលាសណ្ឋាគារ និងទេសចរណ៍ ប៉ូល ឌុយប្រ៊ូល ក្នុងការបន្តពង្រឹងគុណភាពការអប់រំ និងការបណ្តុះបណ្តាលជំនាញវិជ្ជាជីវៈទេសចរណ៍ ព្រមទាំងបង្កើតធនធានមនុស្សដែលមានសមត្ថភាព វិជ្ជាជីវៈ សីលធម៌ និងភាពប្រកួតប្រជែងខ្ពស់ ដើម្បីគាំទ្រការអភិវឌ្ឍវិស័យទេសចរណ៍កម្ពុជាប្រកបដោយចីរភាព។
