ខេត្តស្ទឹងត្រែង៖ នៅថ្ងៃទី២៨ ខែកក្កដា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងការណែនាំបន្ថែមពី លោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ លោកបណ្ឌិត គឹម ប៊ុនណារ៉ា អនុប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ បានអញ្ជើញចូលរួមជាគ្រូឧទ្ទេសក្នុងវគ្គបណ្តុះបណ្តាល «ជំនាញមគ្គុទ្ទេសក៍ទេសចរណ៍ថ្នាក់សហគមន៍» សម្រាប់ខេត្តស្ទឹងត្រែង។
ក្នុងដំណើរការនៃវគ្គបណ្តុះបណ្តាល លោកគ្រូឧទ្ទេសបានចែករំលែកចំណេះដឹង បទពិសោធន៍ជាក់ស្តែង និងបច្ចេកទេសវិជ្ជាជីវៈលើមេរៀនសំខាន់ៗស្តីពី បដិសណ្ឋារកិច្ច សីលធម៌ សុជីវធម៌ និងពិធីការ សម្រាប់មគ្គុទ្ទេសក៍ទេសចរណ៍ថ្នាក់សហគមន៍ ដោយគោលបំណងសំខាន់នៃមេរៀន រួមមាន៖
១.ពង្រឹងការយល់ដឹងអំពីគោលការណ៍បដិសណ្ឋារកិច្ច និងសេវាកម្មប្រកបដោយវិជ្ជាជីវៈសម្រាប់ភ្ញៀវទេសចរ។
២.បណ្តុះស្មារតីសីលធម៌ សុជីវធម៌ សុចរិតភាព និងការទទួលខុសត្រូវក្នុងការបំពេញតួនាទីជាមគ្គុទ្ទេសក៍ទេសចរណ៍។
៣.អភិវឌ្ឍជំនាញទំនាក់ទំនង ការប្រាស្រ័យទាក់ទង និងអាកប្បកិរិយាសមរម្យជាមួយភ្ញៀវទេសចរ សហគមន៍ និងភាគីពាក់ព័ន្ធ។
៤.យល់ដឹង និងអនុវត្តពិធីការ ឥរិយាបថ និងសុជីវធម៌ក្នុងការទទួលស្វាគមន៍ និងបម្រើភ្ញៀវទេសចរប្រកបដោយភាពថ្លៃថ្នូរ។
៥.ពង្រឹងសមត្ថភាពក្នុងការដោះស្រាយបញ្ហា និងស្ថានការណ៍នានា ដោយភាពអត់ធ្មត់ វិជ្ជាជីវៈ និងការគោរពភាពខុសគ្នារបស់ភ្ញៀវទេសចរ។
៦.លើកកម្ពស់គុណភាពសេវាកម្ម និងកសាងបទពិសោធន៍ល្អជូនភ្ញៀវទេសចរ ស្របតាមស្តង់ដារវិជ្ជាជីវៈ និងគោលការណ៍ទេសចរណ៍ប្រកបដោយគុណភាព។
មេរៀននេះមានសារៈសំខាន់ក្នុងការពង្រឹងសមត្ថភាពមគ្គុទ្ទេសក៍ទេសចរណ៍ថ្នាក់សហគមន៍ឱ្យមានចំណេះដឹង ជំនាញ និងឥរិយាបថវិជ្ជាជីវៈក្នុងការទទួលស្វាគមន៍ ថែទាំ និងផ្តល់សេវាជូនភ្ញៀវទេសចរប្រកបដោយភាពរួសរាយរាក់ទាក់ សុជីវធម៌ និងការគោរពពិធីការ។ ការអនុវត្តបានត្រឹមត្រូវនូវគោលការណ៍បដិសណ្ឋារកិច្ច និងសីលធម៌វិជ្ជាជីវៈ នឹងរួមចំណែកលើកកម្ពស់គុណភាពសេវាកម្ម បង្កើនការពេញចិត្តរបស់ភ្ញៀវទេសចរ និងត្រៀមខ្លួនរួចជាស្រេចក្នុងការផ្តល់សេវាកម្មប្រកបដោយគុណភាព សម្រាប់ព្រឹត្តិការណ៍ទេសចរណ៍រដូវកាលបៃតង ក្រោមមូលបទ «សក្តានុពលអេកូទេសចរណ៍ភូមិភាគឦសានក្នុងរដូវកាលបៃតង ឆ្នាំ២០២៦» ដែលនឹងប្រព្រឹត្តទៅនៅថ្ងៃទី៨-៩ ខែសីហា ឆ្នាំ២០២៦ ខាងមុខ នៅខេត្តស្ទឹងត្រែង។
