«ការរៀនសូត្រពេញមួយជីវិត គឺជាគន្លឹះនៃការអភិវឌ្ឍជំនាញ ការរីកចម្រើនក្នុងអាជីព និងការលើកកម្ពស់គុណភាពសេវាកម្មទេសចរណ៍កម្ពុជា ឆ្ពោះទៅអនាគតរួមគ្នាប្រកបដោយចីរភាព»។

ក្នុងឱកាសនៃព្រឹត្តិការណ៍ «ទិវាជំនាញហូកា ឆ្នាំ២០២៦» ក្រោមប្រធានបទគោល «ជំនាញសម្រាប់អនាគតរួមគ្នា៖ ពង្រឹងសមត្ថភាពអ្នកជំនាញទេសចរណ៍តាមរយៈការសិក្សាពេញមួយជីវិត (Skills for a Shared Future: Empowering Tourism Professionals through Lifelong Learning)» វេទិកាពិភាក្សាលើប្រធានបទទី១ ក្រោមចំណងជើង «ជំនាញឆ្ពោះទៅរកអាជីព៖ ការកសាងមាគ៌ានៃការរៀនសូត្រពេញមួយជីវិត សម្រាប់អ្នកជំនាញក្នុងវិស័យទេសចរណ៍»។

វេទិកាពិភាក្សានេះ ត្រូវបានរៀបចំឡើងក្នុងគោលបំណងជំរុញការផ្លាស់ប្តូរទស្សនៈ ចំណេះដឹង និងបទពិសោធជាក់ស្តែងរវាងតំណាងស្ថាប័នរដ្ឋ ដៃគូអភិវឌ្ឍន៍អន្តរជាតិ គ្រឹះស្ថានបណ្តុះបណ្តាល និងវិស័យឯកជន ដើម្បីរួមគ្នាពិភាក្សា និងកំណត់មាគ៌ាអភិវឌ្ឍជំនាញវិជ្ជាជីវៈឱ្យកាន់តែមានប្រសិទ្ធភាព ស្របតាមតម្រូវការជាក់ស្តែងនៃទីផ្សារការងារ និងការវិវត្តនៃវិស័យទេសចរណ៍ និងបដិសណ្ឋារកិច្ច។

ជាពិសេស វេទិកានេះនឹងផ្តោតលើការបង្កើតមាគ៌ានៃការសិក្សា និងការអភិវឌ្ឍអាជីពជាបន្តបន្ទាប់ ដោយភ្ជាប់ការបណ្តុះបណ្តាលជំនាញទៅនឹងឱកាសការងារ ការអនុវត្តជាក់ស្តែងនៅតាមមូលដ្ឋានអាជីវកម្ម ការលើកកម្ពស់សមត្ថភាពវិជ្ជាជីវៈ និងការទទួលស្គាល់ជំនាញដែលទទួលបានពីបទពិសោធការងារ។ ការរៀនសូត្រពេញមួយជីវិត គឺជាកត្តាសំខាន់ក្នុងការជួយឱ្យអ្នកជំនាញទេសចរណ៍អាចបន្តពង្រឹងសមត្ថភាព សម្របខ្លួនទៅនឹងការផ្លាស់ប្តូរ និងបង្កើនឱកាសរីកចម្រើនក្នុងអាជីពរបស់ខ្លួន។

សម្របសម្រួលវេទិកាពិភាក្សា៖

លោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាប្រធានលេខាធិការដ្ឋាននៃគណៈកម្មការគ្រប់គ្រងគម្រោងហូកា (គ.គ.ហ.)។

វាគ្មិនកិត្តិយសចូលរួមចែករំលែកបទពិសោធ និងទស្សនៈរួមមាន៖

១. លោក គង់ ដារ៉ា ប្រធានកម្មវិធីអភិវឌ្ឍន៍ជំនាញ នៃអង្គការស្វីសខន់ថាក់ (Swisscontact)។

២. លោក ពេជ្រ គឹមហ៊ាន សមាជិកក្រុមប្រឹក្សាភិបាលនៃសមាគមទេសចរណ៍កម្ពុជា (CATA)។

៣. លោកស្រី ម៉ែន មករា អគ្គនាយិការងនៃអង្គការដើម្បីភាពញញឹមនៃកុមារ និងជានាយិកាវិទ្យាស្ថាន PSE។

៤. លោក ហាប់ ហោន (Tony) អគ្គនាយកគ្រប់គ្រងនៃក្រុមហ៊ុន P.S Hospitality។

៥. លោក ស៊ិន បញ្ញា (Sin Panya) Cluster General Manager នៃក្រុមហ៊ុន Elite Hospitality & Management។

តាមរយៈការចូលរួមពីវាគ្មិនដែលមានបទពិសោធ និងជំនាញក្នុងវិស័យពាក់ព័ន្ធ វេទិកានេះរំពឹងថានឹងផ្តល់នូវទស្សនៈថ្មីៗ និងអនុសាសន៍ជាក់ស្តែងសម្រាប់ការរៀបចំមាគ៌ាអភិវឌ្ឍជំនាញ និងការរីកចម្រើនក្នុងអាជីពរបស់អ្នកជំនាញទេសចរណ៍ ព្រមទាំងជំរុញឱ្យមានការចូលរួមកាន់តែសកម្មពីគ្រប់ភាគីពាក់ព័ន្ធ ក្នុងការកសាងប្រព័ន្ធអភិវឌ្ឍជំនាញប្រកបដោយភាពបត់បែន បរិយាបន្ន និងនិរន្តរភាព។