រាជធានីភ្នំពេញ៖ កាលពីរសៀលថ្ងៃទី៥ ខែវិច្ឆិកា ឆ្នាំ២០២៦ ដោយទទួលការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ឯកឧត្តម បាក់ សុខុម រដ្ឋលេខាធិការ និងជាប្រធានគណៈកម្មការគ្រប់គ្រងគម្រោងហូកា រួមជាមួយ លោក Subas Subedi ប្រធានក្រុមគ្រប់គ្រងកម្មវិធីអភិវឌ្ឍន៍ជំនាញ (SDP) នៃអង្គការ Swisscontact បានអញ្ជើញជាអធិបតីចូលរួមពិធីបើក សិក្ខាសាលាផ្សព្វផ្សាយ និងប្រកាសដាក់ឱ្យដំណើរការជាផ្លូវការនូវចលនាប្រឡងប្រណាំង៖“បដិសណ្ឋារកិច្ចកម្ពុជាបៃតង(ហូកាបៃតង)” នៅសណ្ឋាគារ អានីក (Anik Palace Hotel)។
សិក្ខាសលានេះក៏មានការអញ្ជើញចូលរួមពីសំណាក់ លោក លោកស្រី មន្រ្តីរាជការក្រសួងទេសចរណ៍ ក្រុមការងារអង្គការស្វីសខន់ថាក់ លោក លោកស្រីគ្រូបង្គោលមកពីខេត្តគោលដៅ ទាំង១២ វិស័យឯកជន និងភាគីពាក់ព័ន្ធប្រមាណជា១២០រូប។
ក្រសួងទេសចរណ៍ សហការជាមួយកម្មវិធីអភិវឌ្ឍន៍ជំនាញ (SDP) នៃអង្គការ Swisscontact បានរៀបចំចលនាប្រឡងប្រណាំង «ហូកាបៃតង» ឡើង ក្នុងគោលបំណងលើកទឹកចិត្ត និងផ្តល់ការទទួលស្គាល់ដល់ប្រតិបត្តិករទេសចរណ៍ ដែលបានអនុវត្តគោលការណ៍ 3Rs (កាត់បន្ថយ ប្រើប្រាស់ឡើងវិញ និងកែច្នៃ) ប្រកបដោយប្រសិទ្ធភាពក្នុងវិស័យបដិសណ្ឋារកិច្ច ព្រមទាំងពង្រឹងសមត្ថភាពអ្នកជំនាញ និងប្រតិបត្តិករក្នុងវិស័យបដិសណ្ឋារកិច្ច ឱ្យយល់ដឹងកាន់តែច្បាស់អំពីការអនុវត្តគោលការណ៍បៃតង ការគ្រប់គ្រងធនធានប្រកបដោយប្រសិទ្ធភាព និងការលើកកម្ពស់ស្តង់ដាគុណភាពសេវាកម្មទេសចរណ៍នៅកម្ពុជា។
គូសបញ្ជាក់ផងដែរថា ជ័យលាភី និងអត្ថប្រយោជន៍ (សរុប ៥២ រង្វាន់)៖
១.🥇 ជ័យលាភីកម្រិត «មាស» (១៦ រង្វាន់)៖ ប្រាក់រង្វាន់ ៤,៨០០,០០០ រៀល (~១,២០០ ដុល្លារអាមេរិក) អមដោយស្លាកសញ្ញាជ័យលាភីកិត្តិយស និងវិញ្ញាបនបត្រ
២.🥈 ជ័យលាភីកម្រិត «ប្រាក់» (១២ រង្វាន់)៖ ប្រាក់រង្វាន់ ៣,២០០,០០០ រៀល (~៨០០ ដុល្លារអាមេរិក) អមដោយស្លាកសញ្ញាជ័យលាភីកិត្តិយស និងវិញ្ញាបនបត្រ
៣.🥉 ជ័យលាភីកម្រិត «សំរឹទ្ធ» (២៤ រង្វាន់)៖ ប្រាក់រង្វាន់ ២,៤០០,០០០ រៀល (~៦០០ ដុល្លារអាមេរិក) អមដោយស្លាកសញ្ញាជ័យលាភីកិត្តិយស និងវិញ្ញាបនបត្រ។
