ទីស្តីការក្រសួងទេសចរណ៍៖ នៅរសៀលថ្ងៃទី៧ ខែសីហា ឆ្នាំ២០២៦ លោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាប្រធានលេខាធិការដ្ឋានគណៈកម្មការជាតិអ្នកជំនាញទេសចរណ៍ បានដឹកនាំមន្ត្រីជំនាញនៃនាយកដ្ឋាន ជួបពិភាក្សាការងារជាមួយតំណាង អង្គការតុកកែញញឹមកម្ពុជា-Smiling Gecko Cambodia ដើម្បីពិនិត្យ និងស្វែងរកលទ្ធភាពពង្រីកកិច្ចសហប្រតិបត្តិការក្នុងការបណ្តុះបណ្តាលជំនាញវិជ្ជាជីវៈ សម្រាប់វិស័យបដិសណ្ឋារកិច្ច និងទេសចរណ៍ សំដៅរួមចំណែកពង្រឹងគុណភាពធនធានមនុស្ស និងឆ្លើយតបនឹងតម្រូវការជាក់ស្តែងរបស់ទីផ្សារការងារ ស្របតាមស្តង់ដារជាតិ អាស៊ាន និងអន្តរជាតិ។
ក្នុងជំនួបនេះ លោកបណ្ឌិត ជួប រតនា បានសម្តែងនូវការស្វាគមន៍យ៉ាងកក់ក្តៅចំពោះវត្តមានរបស់តំណាងអង្គការតុកកែញញឹមកម្ពុជា និងបានវាយតម្លៃខ្ពស់ចំពោះគំនិតផ្តួចផ្តើមក្នុងការកសាងភាពជាដៃគូជាមួយក្រសួងទេសចរណ៍។ លោកបណ្ឌិតបានគូសបញ្ជាក់ថា ការចូលរួមពីដៃគូអភិវឌ្ឍន៍ និងស្ថាប័នពាក់ព័ន្ធ គឺជាកម្លាំងសំខាន់ក្នុងការបង្កើតឱកាសសិក្សា និងបណ្តុះបណ្តាលជំនាញដែលផ្តោតលើការអនុវត្តជាក់ស្តែង ព្រមទាំងជួយឱ្យយុវជន និងអ្នកជំនាញទេសចរណ៍ទទួលបានសមត្ថភាពដែលអាចប្រើប្រាស់បានពិតប្រាកដក្នុងទីផ្សារការងារ។
លោកបណ្ឌិតក៏បានគូសបញ្ជាក់អំពីការដឹកនាំប្រកបដោយចក្ខុវិស័យ និងការយកចិត្តទុកដាក់ខ្ពស់របស់ ឯកឧត្តមរដ្ឋមន្ត្រីក្រសួងទេសចរណ៍ លើការអភិវឌ្ឍធនធានមនុស្សក្នុងវិស័យទេសចរណ៍ តាមរយៈការដាក់ឱ្យអនុវត្តកម្មវិធីបណ្តុះបណ្តាលសំខាន់ៗចំនួន ៣ រួមមាន៖ កម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa), កម្មវិធីបណ្តុះបណ្តាលស្របតាមក្របខណ្ឌគុណវុឌ្ឍិជាតិ (CQF) និងកម្មវិធីបណ្តុះបណ្តាលស្របតាមស្តង់ដារអាស៊ាន (ASEAN MRA-TP)។
កម្មវិធីទាំងនេះ គឺជាយន្តការសំខាន់សម្រាប់ពង្រឹងចំណេះដឹង ជំនាញ និងសមត្ថភាពវិជ្ជាជីវៈរបស់អ្នកបម្រើការងារក្នុងវិស័យទេសចរណ៍ និងបដិសណ្ឋារកិច្ច ព្រមទាំងជួយបង្កើនគុណភាពសេវាកម្ម បង្កើនឱកាសការងារ និងបង្កើនសមត្ថភាពប្រកួតប្រជែងរបស់កម្លាំងពលកម្មកម្ពុជា ស្របតាមតម្រូវការទីផ្សារការងារក្នុងប្រទេស តំបន់ និងអន្តរជាតិ។
ក្នុងកិច្ចពិភាក្សា ភាគីទាំងពីរបានផ្លាស់ប្តូរយោបល់ និងពិនិត្យលទ្ធភាពនៃកិច្ចសហប្រតិបត្តិការលើវិស័យអាទិភាពមួយចំនួន រួមមាន៖
១. ការចុះបញ្ជីជាស្ថាប័នបណ្តុះបណ្តាលជំនាញវិជ្ជាជីវៈទេសចរណ៍
ពិនិត្យនីតិវិធី និងលទ្ធភាពចុះបញ្ជី អង្គការតុកកែញញឹមកម្ពុជា-Smiling Gecko Cambodia
ជាស្ថាប័នបណ្តុះបណ្តាលជំនាញវិជ្ជាជីវៈទេសចរណ៍ ក្នុងវិស័យបដិសណ្ឋារកិច្ច ដើម្បីអាចរៀបចំ និងផ្តល់កម្មវិធីបណ្តុះបណ្តាលប្រកបដោយគុណភាព ផ្អែកលើសមត្ថភាព និងស្របតាមស្តង់ដារវិជ្ជាជីវៈ ដែលអាចរួមចំណែកដល់ការលើកកម្ពស់សមត្ថភាពអ្នកជំនាញ និងបង្កើនឱកាសការងារទាំងក្នុងប្រទេស តំបន់ និងអន្តរជាតិ។
២. ការអនុវត្តគម្រោងសាកល្បងលើជំនាញចុងភៅ
ពិនិត្យលទ្ធភាពផ្តល់ឯកសារ និងឧបករណ៍ពាក់ព័ន្ធនឹង ក្របខណ្ឌគុណវុឌ្ឍិផ្អែកលើសមត្ថភាព ដើម្បីគាំទ្រដល់ការអនុវត្ត គម្រោងសាកល្បង (Pilot Project) លើជំនាញចុងភៅ សម្រាប់សិស្សចំនួន ២៥នាក់ របស់អង្គការតុកកែញញឹមកម្ពុជា-Smiling Gecko Cambodia។ គម្រោងនេះ នឹងផ្តោតលើការពង្រឹងទាំងចំណេះដឹងទ្រឹស្តី ជំនាញអនុវត្ត និងសមត្ថភាពវិជ្ជាជីវៈ ដើម្បីឱ្យសិស្សអាចត្រៀមខ្លួនបានល្អសម្រាប់ការចូលទៅក្នុងទីផ្សារការងារ។
កិច្ចសហប្រតិបត្តិការនេះ ត្រូវបានរំពឹងថានឹងក្លាយជាផ្នែកមួយនៃការចូលរួមពង្រឹងប្រព័ន្ធអេកូឡូស៊ីនៃការអភិវឌ្ឍជំនាញទេសចរណ៍ តាមរយៈការភ្ជាប់រវាង ការបណ្តុះបណ្តាល ស្តង់ដារវិជ្ជាជីវៈ និងតម្រូវការទីផ្សារការងារ ដើម្បីបង្កើនផលិតភាពការងារ គុណភាពសេវាកម្ម និងភាពប្រកួតប្រជែងរបស់ធនធានមនុស្សកម្ពុជា និងគាំទ្រដល់ចក្ខុវិស័យរបស់រាជរដ្ឋាភិបាលក្នុងការអភិវឌ្ឍវិស័យទេសចរណ៍កម្ពុជាឱ្យក្លាយជាវិស័យសេដ្ឋកិច្ចប្រកបដោយភាពធន់ បរិយាបន្ន និងចីរភាព។
