ខេត្តសៀមរាប៖ នាព្រឹកថ្ងៃទី៨ ខែវិច្ឆិកា ឆ្នាំ២០២៦ លោក ចឹក គារុណ អនុប្រធាននាយកដ្ឋាន និងជាតំណាងរបស់ លោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ រួមជាមួយ លោក ណុប វល័ក្ខ នាយករងសាខានៃសាកលវិទ្យាល័យវ៉ាន់ដា ខេត្តសៀមរាប បានអញ្ជើញដឹកនាំសិក្ខាសាលាតម្រង់ទិសស្ដីពី «ការចុះកម្មសិក្សា និងសរសេររបាយការណ៍ស្រាវជ្រាវ» នៃវគ្គបណ្តុះបណ្តាលមគ្គុទ្ទេសក៍ទេសចរណ៍ថ្នាក់តំបន់សៀមរាប និងតំបន់ជុំវិញ ជំនាន់ទី២៨។
កម្មវិធីនេះមានការអញ្ជើញចូលរួមពីសំណាក់មន្ត្រីជំនាញនៃក្រសួងទេសចរណ៍ គណៈគ្រប់គ្រងសាខាសាកលវិទ្យាល័យវ៉ាន់ដា ខេត្តសៀមរាប និងសិក្ខាកាមមគ្គុទ្ទេសក៍ទេសចរណ៍ សរុបប្រមាណ ៨០រូប។
នៅក្នុងឱកាសនោះ មន្ត្រីជំនាញបានធ្វើបទបង្ហាញតម្រង់ទិសអំពីគោលបំណង នីតិវិធីនៃការចុះកម្មសិក្សា និងវិធីសាស្ត្រនៃការសរសេររបាយការណ៍ស្រាវជ្រាវ អមដោយការចាប់ឆ្នោតជ្រើសរើសក្រុមសិក្ខាកាម សម្រាប់ដាក់ជូនសាស្ត្រាចារ្យណែនាំ (ចាប់ដោយចៃដន្យ) ព្រមទាំងមានកិច្ចពិភាក្សា និងសំណួរចម្លើយយ៉ាងផុសផុល។ ដំណាក់កាលចុះកម្មសិក្សានេះ ត្រូវបានរៀបចំឡើងបន្ទាប់ពីសិក្ខាកាមបានបញ្ចប់វគ្គបណ្តុះបណ្តាលទ្រឹស្តីក្នុងថ្នាក់ដោយជោគជ័យ ដោយត្រូវបន្តចុះកម្មសិក្សាអនុវត្តជាក់ស្តែង និងចងក្រងរបាយការណ៍ស្រាវជ្រាវរយៈពេល ២ខែបន្ថែមទៀត មុននឹងត្រូវឡើងការពាររបាយការណ៍នៅចំពោះមុខគណៈកម្មការវាយតម្លៃ ដើម្បីទទួលបានលទ្ធផលជាស្ថាពរសម្រាប់បម្រើឱ្យការស្នើសុំអាជ្ញាបណ្ណប្រកបវិជ្ជាជីវៈជាមគ្គុទ្ទេសក៍ទេសចរណ៍ស្របច្បាប់។
ជាចុងក្រោយ តំណាងក្រសួងទេសចរណ៍ និងតំណាងគណៈគ្រប់គ្រងសាខាសាកលវិទ្យាល័យ បានផ្តាំផ្ញើ និងលើកទឹកចិត្តដល់សិក្ខាកាមទាំងអស់ ត្រូវពង្រឹងកិច្ចសហការឱ្យបានស្អិតរមួតនៅក្នុងក្រុម ព្រមទាំងពិគ្រោះយោបល់ជាមួយសាស្ត្រាចារ្យណែនាំឱ្យបានជាប្រចាំ ដើម្បីធានាឱ្យបាននូវគុណភាពនៃការស្រាវជ្រាវ ស្របតាមគោលការណ៍ណែនាំបច្ចេកទេស និងឆ្លើយតបជាឧត្តមប្រយោជន៍ដល់វិស័យទេសចរណ៍ និងសង្គមជាតិទាំងមូល។
