រាជធានីភ្នំពេញ៖ នៅថ្ងៃទី៦ ខែវិច្ឆិកា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងការណែនាំផ្ទាល់ពី លោក ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ លោក ចឹក គារុណ អនុប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលឥតគិតថ្លៃលើជំនាញដុតនំកម្រិតដំបូង (Bakery) ជំនាន់ទី៩ នៅមជ្ឈមណ្ឌលឧត្តមភាពអាហារម៉ីសាន (Meisan Excellence Center) នៃអគារ Exchange Square។
ពិធីនេះមានការចូលរួមពីថ្នាក់ដឹកនាំក្រុមហ៊ុន Wilmar Marketing CLV ប្រចាំកម្ពុជា មន្ត្រីជំនាញ និងសិក្ខាកាមសរុបប្រមាណ ៤៥នាក់ ទាំងព្រឹក និងរសៀល។
វគ្គបណ្តុះបណ្តាលនេះ គឺជាផ្លែផ្កានៃកិច្ចសហប្រតិបត្តិការរវាងក្រសួងទេសចរណ៍ និងក្រុមហ៊ុន Wilmar Marketing CLV ក្នុងគោលបំណងលើកកម្ពស់សមត្ថភាពផ្នែកផលិតកម្មម្ហូបអាហារ។ ការពង្រឹងជំនាញដុតនំគឺជាកត្តាសំខាន់ក្នុងការឆ្លើយតបទៅនឹងតម្រូវការរបស់ភ្ញៀវទេសចរជាតិ និងអន្តរជាតិ ព្រមទាំងរួមចំណែកយ៉ាងសកម្មក្នុងការលើកកម្ពស់គុណភាពសេវាកម្មក្នុងឧស្សាហកម្មទេសចរណ៍កម្ពុជាឱ្យកាន់តែប្រសើរឡើង។
វគ្គបណ្តុះបណ្តាលលើជំនាញដុតនំកម្រិតដំបូង (Bakery) ជំនាន់ទី៩ នេះចាប់ផ្តើមសិក្សាពីថ្ងៃទី៦ ខែវិច្ឆិកា ឆ្នាំ២០២៦ ដោយសិក្ខាកាម
នឹងត្រូវសិក្សាទាំងទ្រឹស្តី និងការអនុវត្តផ្ទាល់លើមុខនំចំនួន ១០ប្រភេទ ក្នុងរយៈពេល ៧២ម៉ោង។ បន្ទាប់ពីបញ្ចប់វគ្គសិក្សា សិក្ខាកាមត្រូវឆ្លងកាត់ការធ្វើតេស្តសមត្ថភាព ដើម្បីទទួលបានវិញ្ញាបនបត្របញ្ជាក់ការសិក្សាដែលទទួលស្គាល់ដោយក្រសួងទេសចរណ៍។
ឆ្លៀតក្នុងឱកាសនោះ លោកអនុប្រធាន ក៏បានប្រគល់លិខិតសរសើរដែលចុះហត្ថលេខាផ្ទាល់ដោយ ឯកឧត្តមរដ្ឋមន្ត្រីក្រសួងទេសចរណ៍ ជូនដល់ក្រុមហ៊ុនWilmar Marketing CLV ដោយក្រសួងទេសចរណ៍ សូមធ្វើការកោតសរសើរ និងវាយតម្លៃខ្ពស់ចំពោះ មជ្ឈមណ្ឌលឧត្តមភាពម្ហូបអាហារម៉ីសាន ដែលបានបង្ហាញពីការប្តេជ្ញាចិត្ត និងភាពទទួលខុសត្រូវខ្ពស់ ក្នុងការចូលរួមយ៉ាងសកម្មជាមួយរាជរដ្ឋាភិបាល តាមរយៈការគាំទ្រ និងសហការនៅក្នុងកម្មវិធីបណ្តុះបណ្តាលជំនាញវិជ្ជាជីវៈទេសចរណ៍(ជំនាញដុតនំ)។
ក្រសួងទេសចរណ៍ សង្ឃឹមយ៉ាងមុតមាំថា មជ្ឈមណ្ឌលឧត្តមភាពម្ហូបអាហារម៉ីសាន នឹងបន្តពង្រឹង និងពង្រីកកិច្ចសហប្រតិបត្តិការជាមួយក្រសួងបន្ថែមទៀត ដើម្បីរួមចំណែកក្នុងការបង្កើតកម្លាំងពលកម្មមានជំនាញខ្ពស់ និងលើកកម្ពស់សក្តានុពលវិស័យទេសចរណ៍កម្ពុជា ឱ្យកាន់តែរីកចម្រើន និងមានភាពរឹងមាំនៅលើឆាកអន្តរជាតិ។
គួរបញ្ជាក់ផងដែរថា គិតមកទល់ពេលនេះ ក្រសួងទេសចរណ៍ និងក្រុមហ៊ុន Wilmar Marketing CLV បានបញ្ចប់ការបណ្តុះបណ្តាលដោយផ្ទាល់ចំនួន ៨ជំនាន់ រួចមកហើយ ដែលមានសិក្ខាកាមជោគជ័យចំនួន ២២៨នាក់ រួមទាំងការបណ្តុះបណ្តាលតាមប្រព័ន្ធអនឡាញជូនដល់សិក្ខាកាមសរុបចំនួន ២,៧១០ នាក់។
