សូមអបអរសាទរដល់សិក្ខាកាមទាំង ៣៥រូប នៃវគ្គបណ្ដុះបណ្ដាល អ្នកវាយតម្លៃបង្គោលជាតិ នៃសេវាកម្មសណ្ឋាគារ ស្របតាមស្ដង់ដារអាស៊ាន ដែលបញ្ចប់វគ្គបណ្ដុះបណ្ដាលដោយជោគជ័យ!

ខេត្តសៀមរាប៖ សកម្មភាពថ្ងៃទី៦ និងទី៧ នៃវគ្គបណ្តុះបណ្តាលអ្នកវាយតម្លៃបង្គោលជាតិ (National Assessors) លើសេវាកម្មសណ្ឋាគារ ស្របតាមក្របខណ្ឌកិច្ចព្រមព្រៀងអាស៊ាន ស្តីពីការទទួលស្គាល់គ្នាទៅវិញទៅមកលើអ្នកជំនាញទេសចរណ៍ (ASEAN MRA-TP) សិក្ខាកាមបានអនុវត្តការវាយតម្លៃជាក់ស្តែង ដោយរៀបចំ និងធ្វើបទបង្ហាញអំពីដំណើរការវាយតម្លៃសមត្ថភាព (Competency Assessment Process) តាមរយៈការជ្រើសរើស ឯកតាសមត្ថភាព (Unit of Competency) មួយពីប្រអប់បណ្តុះបណ្តាលអាស៊ាន (ASEAN Toolbox) ដើម្បីធ្វើការវាយតម្លៃក្នុងរយៈពេល ៣០នាទី។

ក្នុងដំណើរការនេះ សិក្ខាកាមបានរៀបចំ និងប្រើប្រាស់ឯកសារសំខាន់ៗសម្រាប់ការវាយតម្លៃ រួមមាន៖

១. ផែនការវាយតម្លៃ (Assessment Plan)
២. តារាងម៉ាទ្រីសនៃការវាយតម្លៃ (Assessment Matrix)
៣. ឧបករណ៍វាយតម្លៃ (Assessment Tools)
៤. តារាងសម្រេចលទ្ធផលវាយតម្លៃ (Assessment decision grild)
៥. សន្លឹកកត់ត្រាលទ្ធផលនៃការវាយតម្លៃសមត្ថភាព (Competency Recording Sheet)

តាមរយៈការអនុវត្តផ្ទាល់ និងការធ្វើបទបង្ហាញ សិក្ខាកាមបានអភិវឌ្ឍសមត្ថភាពក្នុងការរៀបចំផែនការវាយតម្លៃ កំណត់លក្ខខណ្ឌវិនិច្ឆ័យ (Assessment Criteria) ប្រើប្រាស់ឧបករណ៍វាយតម្លៃឱ្យស្របតាមស្តង់ដារ ប្រមូលភស្តុតាងនៃសមត្ថភាព (Evidence of Competence) និងកត់ត្រាលទ្ធផលវាយតម្លៃប្រកបដោយតម្លាភាព ភាពយុត្តិធម៌ និងវិជ្ជាជីវៈខ្ពស់។ ជាមួយគ្នានេះ សិក្ខាកាមក៏បានទទួលយោបល់ និងអនុសាសន៍ពីគ្រូឧទ្ទេស ដើម្បីកែលម្អ និងពង្រឹងគុណភាពនៃការវាយតម្លៃឱ្យកាន់តែមានប្រសិទ្ធភាព។

ជាលទ្ធផលសិក្ខាកាមទាំងអស់បានបង្ហាញសមត្ថភាពក្នុងការវាយតម្លៃលើជំនាញ និងចំណេះដឹងស្របតាមស្តង់ដាអាស៊ាន ដោយទទួលបានលទ្ធផលបានយ៉ាងល្អប្រសើរ (ក្នុងចំណោមសិក្ខាកាមទាំង ៣៥រូប មានសិក្ខាកាមឆ្នើមចំនួន ៣១រូប និងសិក្ខាកាមមានសមត្ថភាពចំនួន ៣រូប និងបានចូលរួម ១រូប)។ បន្ទាប់ពីបញ្ចប់វគ្គបណ្តុះបណ្តាល សិក្ខាកាមអាចយកប្រអប់បណ្តុះបណ្ដាលអាស៊ាន ទៅប្រើប្រាស់ និងបណ្តុះបណ្តាលខាងក្នុងស្ថាប័នរបស់ខ្លួនបាន។