ខេត្តសៀមរាប៖ ចាប់ពីថ្ងៃទី១១-១៦ ខែកញ្ញា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងការណែនាំបន្ថែមពីលោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាប្រធានលេខាធិការដ្ឋាន គ.គ.ហ. លោក ចឹក គារុណ អនុប្រធាននាយកដ្ឋានបានបញ្ចប់ដោយជោគជ័យកម្មវិធីហាត់ការវិជ្ជាជីវៈតាមមូលដ្ឋានអាជីវកម្ម ផ្នែកគេហកិច្ច នៅសណ្ឋាគារ SARAI RESORT & SPA ខេត្តសៀមរាប។
តាមរយៈការហាត់ការនេះ លោក បានសិក្សាស្វែងយល់កាន់តែស៊ីជម្រៅអំពី រចនាសម្ព័ន្ធ និងការគ្រប់គ្រងផ្នែកគេហកិច្ច ការរៀបចំ និងសម្អាតបន្ទប់ភ្ញៀវ ការរៀបចំតំបន់សាធារណៈ ការគ្រប់គ្រងសម្ភារៈ និងស្តុក ការគ្រប់គ្រងក្រណាត់ និងសម្លៀកបំពាក់ការងារ (Linen & Uniform) ការអនុវត្តនីតិវិធីប្រតិបត្តិស្តង់ដារ (SOPs) ព្រមទាំងការអនុវត្តគោលការណ៍ អនាម័យ សុវត្ថិភាព និងគុណភាពសេវាកម្ម ក្នុងផ្នែកគេហកិច្ច ការរៀបចំការងារ និងការបែងចែកភារកិច្ច ការគ្រប់គ្រងពេលវេលា ការត្រួតពិនិត្យគុណភាពបន្ទប់ និងសេវាកម្ម ការទំនាក់ទំនង និងសហការជាក្រុម ការដោះស្រាយបញ្ហាក្នុងប្រតិបត្តិការប្រចាំថ្ងៃ និងការយល់ដឹងអំពីតម្រូវការរបស់ភ្ញៀវ។
ក្រោយបញ្ចប់កម្មវិធី លោក អាចយកចំណេះដឹង បទពិសោធន៍ និងជំនាញដែលទទួលបានពីការអនុវត្តជាក់ស្តែងទៅ ពង្រឹងការងារបណ្តុះបណ្តាល និងអភិវឌ្ឍសមត្ថភាពអ្នកជំនាញ និងធនធានមនុស្សក្នុងវិស័យទេសចរណ៍ ឱ្យកាន់តែមានភាពសមស្របទៅនឹងតម្រូវការជាក់ស្តែងរបស់វិស័យបដិសណ្ឋារកិច្ច និងទីផ្សារការងារ។
ការចុះហាត់ការនេះ ក៏ជាផ្នែកមួយនៃការលើកកម្ពស់ ការរៀនសូត្រពីបទពិសោធន៍ជាក់ស្តែងនៅតាមមូលដ្ឋានអាជីវកម្ម និងការពង្រឹងកិច្ចសហការរវាងស្ថាប័នរដ្ឋ និងអាជីវកម្មក្នុងវិស័យទេសចរណ៍ ដើម្បីរួមចំណែកអភិវឌ្ឍធនធានមនុស្សទេសចរណ៍ឱ្យមានចំណេះដឹង ជំនាញ និងសមត្ថភាពវិជ្ជាជីវៈកាន់តែប្រសើរ។
