រាជធានីភ្នំពេញ៖ នៅថ្ងៃទី១០ ខែសីហា ឆ្នាំ២០២៦ លោក ផារ៉ាក់ ច័ន្ទរតនា មន្ត្រីនៃនាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ នៃក្រសួងទេសចរណ៍ បានបញ្ចប់ដោយជោគជ័យនូវវគ្គបណ្តុះបណ្តាល គ្រូបង្គោលជាតិ HoKa លើជំនាញការិយាល័យជួរមុខ និងគេហកិច្ច ដែលបានរៀបចំកាលពីថ្ងៃទី៦ ដល់ថ្ងៃទី១១ ខែមេសា ឆ្នាំ២០២៦ កន្លងទៅ។
ការបញ្ចប់វគ្គបណ្តុះបណ្តាលនេះ បានរួមចំណែកពង្រឹងចំណេះដឹង ជំនាញ និងសមត្ថភាពរបស់គ្រូបង្គោលជាតិ ក្នុងការរៀបចំ និងអនុវត្តការបណ្តុះបណ្តាលជំនាញវិជ្ជាជីវៈទេសចរណ៍ ឱ្យស្របតាមស្តង់ដារ និងតម្រូវការជាក់ស្តែងរបស់វិស័យទេសចរណ៍ និងបដិសណ្ឋារកិច្ច។
ក្រោយពីឆ្លងកាត់វគ្គបណ្តុះបណ្តាលនេះ លោកបានពង្រឹងសមត្ថភាពលើចំណេះដឹង ជំនាញ និងឥរិយាបថពាក់ព័ន្ធនឹងជំនាញការិយាល័យជួរមុខ និងគេហកិច្ច ព្រមទាំងវិធីសាស្ត្របង្រៀន ការរៀបចំផែនការបណ្តុះបណ្តាល និងការវាយតម្លៃសមត្ថភាពសិក្ខាកាម។
ការអភិវឌ្ឍសមត្ថភាពគ្រូបង្គោលជាតិ HoKa គឺជាយន្តការសំខាន់ក្នុងការធានានិរន្តរភាពនៃការបណ្តុះបណ្តាលជំនាញវិជ្ជាជីវៈទេសចរណ៍ និងការពង្រឹងមូលធនមនុស្សក្នុងវិស័យទេសចរណ៍ ឱ្យមានគុណភាព សមត្ថភាព និងភាពប្រកួតប្រជែងខ្ពស់ ស្របតាមតម្រូវការទីផ្សារការងារ។
