ខេត្តសៀមរាប៖ ចាប់ពីថ្ងៃទី១១-១៦ ខែកញ្ញា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងការណែនាំបន្ថែមពីលោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាប្រធានលេខាធិការដ្ឋាន គ.គ.ហ. លោក ស្រី សំនិត ប្រធានការិយាល័យនៃនាយកដ្ឋានបានបញ្ចប់ដោយជោគជ័យកម្មវិធីហាត់ការវិជ្ជាជីវៈតាមមូលដ្ឋានអាជីវកម្ម ផ្នែកចុងភៅ នៅសណ្ឋាគារ lYNNAYA URBAN RIVER RESORT&SPA ខេត្តសៀមរាប។
ក្នុងអំឡុងពេលហាត់ការ លោក បានសិក្សាស្វែងយល់ពី រចនាសម្ព័ន្ធ និងការរៀបចំការងារនៅក្នុងផ្ទះបាយ ការរៀបចំតំបន់ការងារ និងឧបករណ៍ផ្ទះបាយ ការរៀបចំ និងត្រួតពិនិត្យវត្ថុធាតុដើម ការរៀបចំគ្រឿងផ្សំ ការអនុវត្តបច្ចេកទេសចម្អិនអាហារ ការរៀបចំ និងបង្ហាញម្ហូប (Food Preparation & Presentation) ព្រមទាំងការអនុវត្តគោលការណ៍ អនាម័យ សុវត្ថិភាពចំណីអាហារ និងស្តង់ដាអនាម័យក្នុងផ្ទះបាយ នីតិវិធីប្រតិបត្តិស្តង់ដារ (SOPs) ការគ្រប់គ្រងស្តុក និងការរក្សាទុកវត្ថុធាតុដើមតាមលក្ខខណ្ឌសមស្រប ការគ្រប់គ្រងសំណល់ ការរៀបចំការងារជាក្រុម និងការសម្របសម្រួលរវាងផ្នែកចុងភៅជាមួយផ្នែកពាក់ព័ន្ធ ដើម្បីធានាបាននូវប្រសិទ្ធភាព គុណភាព និងសុវត្ថិភាពក្នុងការផ្តល់សេវាម្ហូបអាហារជូនភ្ញៀវ។
ក្រោយបញ្ចប់កម្មវិធី ចំណេះដឹង និងបទពិសោធន៍ដែលទទួលបានពីការអនុវត្តជាក់ស្តែង នឹងអាចយកទៅប្រើប្រាស់ក្នុងការងារ ជាពិសេសការចូលរួម ពង្រឹង និងអភិវឌ្ឍការបណ្តុះបណ្តាលជំនាញចុងភៅ ដោយភ្ជាប់ទ្រឹស្តីទៅនឹងការអនុវត្តជាក់ស្តែងនៅតាមមូលដ្ឋានអាជីវកម្ម ព្រមទាំងចែករំលែកបទពិសោធន៍ និងចំណេះដឹងថ្មីៗទៅកាន់មន្ត្រី សិក្ខាកាម និងអ្នកជំនាញទេសចរណ៍។
ការចុះហាត់ការនេះ គឺជាការរួមចំណែកដ៏សំខាន់ក្នុងការពង្រឹង សមត្ថភាពមន្ត្រី និងធនធានមនុស្សក្នុងវិស័យទេសចរណ៍ តាមរយៈការរៀនសូត្រពីបរិយាកាសការងារជាក់ស្តែង និងការអនុវត្តតាមស្តង់ដារអាជីវកម្ម ដើម្បីឆ្លើយតបទៅនឹងតម្រូវការរបស់វិស័យទេសចរណ៍ និងបដិសណ្ឋារកិច្ចកម្ពុជានាពេលបច្ចុប្បន្ន និងអនាគត។
