រាជធានីភ្នំពេញ៖ សាលាបដិសណ្ឋារកិច្ច ប៉េ អេស អឺ ទទួលបានការទទួលស្គាល់ជាផ្លូវការរបស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងត្រូវបានអនុញ្ញាតឱ្យដំណើរការជាសាលាបណ្តុះបណ្តាលជំនាញវិជ្ជាជីវៈទេសចរណ៍ នៅរាជធានីភ្នំពេញ បន្ទាប់ពី ក្រុមការងារនាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ បានចុះត្រួតពិនិត្យ និងវាយតម្លៃលើហេដ្ឋារចនាសម្ព័ន្ធទន់ និងរឹង របស់សាលា។
ការត្រួតពិនិត្យបានផ្តោតលើ បរិក្ខារ និងសម្ភារៈបណ្តុះបណ្តាល បន្ទប់សិក្សា ឯកសារបណ្តុះបណ្តាល កន្លែងអនុវត្តជាក់ស្តែង ធនធានគ្រូបង្គោល ព្រមទាំងលក្ខខណ្ឌចាំបាច់នានា ដើម្បីធានាថាការបណ្តុះបណ្តាលមានគុណភាព និងស្របតាមតម្រូវការរបស់វិស័យទេសចរណ៍។
គួរបញ្ជាក់ថា សាលាបដិសណ្ឋារកិច្ច ប៉េ អេស អឺ ជាសាលាដំបូងគេនៅរាជធានីភ្នំពេញ ដែលបានអនុវត្តកម្មវិធីបណ្តុះបណ្តាលស្របតាម ស្តង់ដាសមត្ថភាពអាស៊ាន ASEAN MRA-TP ដោយមានការអនុញ្ញាតពីក្រសួងទេសចរណ៍។
ចាប់ពីឆ្នាំ២០១៥-២០២៥ សាលាបានបណ្តុះបណ្តាលយុវជនសម្រាប់ចំនួន ១០១២ នាក់ លើសេវាកម្មសណ្ឋាគារចំនួន ៤ជំនាញ ដោយឡែក ២០២៦នេះ សាលាបានបណ្តុះបណ្តាលសិស្សសរុបចំនួន ៨៩នាក់ ក្នុងនោះ ជំនាញការិយាល័យជួរមុខចំនួន ២០នាក់ ជំនាញចុងភៅចំនួន ៣៩នាក់ និងជំនាញម្ហូបអាហារ និងភេសជ្ជៈចំនួន ៣០នាក់។
ការទទួលស្គាល់ជាផ្លូវការនេះ គឺជាសមិទ្ធផលដ៏សំខាន់សម្រាប់សាលា និងជាការចូលរួមចំណែកជាមួយក្រសួងទេសចរណ៍ ក្នុងការពង្រឹងប្រព័ន្ធបណ្តុះបណ្តាលជំនាញវិជ្ជាជីវៈទេសចរណ៍ និងអភិវឌ្ឍធនធានមនុស្សប្រកបដោយចំណេះដឹង ជំនាញ និងសមត្ថភាពវិជ្ជាជីវៈ ស្របតាមតម្រូវការទីផ្សារការងារ។ តាមរយៈការទទួលស្គាល់នេះ សាលាបដិសណ្ឋារកិច្ច ប៉េ អេស អឺ នឹងបន្តដើរតួនាទីជាដៃគូសំខាន់ក្នុងការបណ្តុះបណ្តាលយុវជន និងអ្នកជំនាញទេសចរណ៍ ពង្រឹងគុណភាពសេវាកម្ម និងរួមចំណែកលើកកម្ពស់ស្តង់ដាបដិសណ្ឋារកិច្ច ព្រមទាំងភាពប្រកួតប្រជែងរបស់វិស័យទេសចរណ៍កម្ពុជា។
