ខេត្តសៀមរាប៖ កាលពីថ្ងៃទី៣០ ខែតុលា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍បានអញ្ជើញជាអធិបតី ដ៏ខ្ពង់ខ្ពស់ប្រគល់វិញ្ញាបនបត្រជូនសិក្ខាកាមជ័យលាភី “សិក្ខាសាលាបណ្តុះបណ្តាលពង្រឹងសមត្ថភាពអ្នកជំនាញស្ប៉ា និងសុខុមាលភាព” ទាំង ១០០រូប នាឱកាស«វេទិកាផ្គូផ្គងឱកាសការងារក្នុងវិស័យទេសចរណ៍ ឆ្នាំ២០២៦» នៅសាលាសណ្ឋាគារ និងទេសចរណ៍ ប៉ូលឌុយប្រ៊ូល ខេត្តសៀមរាប ។
គួររំលឹកផងដែរថា ក្រសួងទេសចរណ៍ តាមរយៈនាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ បានបើក“សិក្ខាសាលាបណ្តុះបណ្តាលពង្រឹងសមត្ថភាពអ្នកជំនាញស្ប៉ា និងសុខុមាលភាព” ចំនួន១វគ្គ សម្រាប់ខេត្តសៀមរាប កាលពីថ្ងៃទី៥-៧ ខែតុលា ឆ្នាំ២០២៦ ដែលមានសិក្ខាកាម សរុបទាំង៤វគ្គចំនួន ១០០រូប (ស្រី ៨៤រូប និងជនមានពិការភាព ៨រូប)។
គួរបញ្ជាក់ផងដែរថា សិក្ខាសាលានេះ រៀបចំឡើងក្នុងគោលបំណងពង្រឹងសមត្ថភាព ចែករំលែកចំណេះដឹង និងបច្ចេកទេសថ្មីៗ ព្រមទាំងតម្រង់ទិសវិជ្ជាជីវៈដល់ប្រតិបត្តិករ និងបុគ្គលិកបម្រើសេវាកម្មស្ប៉ា និងសុខុមាលភាព ឱ្យមានមូលដ្ឋានគ្រឹះច្បាស់លាស់ក្នុងការផ្តល់សេវាកម្មប្រកបដោយស្តង់ដារវិជ្ជាជីវៈ។ តាមរយៈកម្មវិធីនេះសិក្ខាកាមបានស្វែងយល់កាន់តែស៊ីជម្រៅអំពីសញ្ញាណទូទៅនៃវិជ្ជាជីវៈស្ប៉ា និងសុខុមាលភាព បច្ចេកទេសនៃការធ្វើស្ប៉ា-ម៉ាស្សា (ចំណុចគួរធ្វើ និងមិនគួរធ្វើ) ព្រមទាំងក្រមសីលធម៌វិជ្ជាជីវៈ។
តាមរយៈសមិទ្ធផលនេះ ក្រសួងទេសចរណ៍ រំពឹងថា សិក្ខាកាមទាំង ១០០រូប នឹងយកចំណេះដឹង ជំនាញ និងបទពិសោធន៍ដែលទទួលបានទៅអនុវត្តក្នុងការបម្រើសេវាកម្មជាក់ស្តែង ប្រកបដោយវិជ្ជាជីវៈ សីលធម៌ និងការទទួលខុសត្រូវខ្ពស់ ព្រមទាំងបន្តអភិវឌ្ឍសមត្ថភាពរបស់ខ្លួនឱ្យស្របតាមស្តង់ដាសេវាកម្មទេសចរណ៍ជូនដល់ភ្ញៀវប្រកបដោយគុណភាព។
