ខេត្តសៀមរាប៖ ចាប់ពីថ្ងៃទី១ ដល់ថ្ងៃទី៤ ខែកញ្ញា ឆ្នាំ២០២៦ ក្រោមកិច្ចសហការរវាងកម្មវិធីអភិវឌ្ឍន៍ជំនាញ (SDP) នៃអង្គការស្វីសខនថាក់ (Swisscontact) និងក្រុមហ៊ុន GBS បានបើកវគ្គគ្រូបណ្តុះបណ្តាលបដិសណ្ឋារកិច្ចកម្ពុជា (ហូកា) លើជំនាញឆុងកាហ្វេ នៅខេត្តសៀមរាប ដើម្បីពង្រឹងសមត្ថភាពជូនគ្រូបង្គោលបដិសណ្ឋារកិច្ចកម្ពុជាហូកា មកពីតាមខេត្តគោលដៅ ដោយមានសិក្ខាកាមចូលរួមចំនួន ១៤រូប (ស្រី ៨រូប)។
សកម្មភាពបណ្តុះបណ្តាលនេះ គឺជារបត់ដ៏មានសារៈសំខាន់មួយទៀតក្នុងការលើកកម្ពស់គុណវុឌ្ឍិ និងជំនាញវិជ្ជាជីវៈក្នុងវិស័យទេសចរណ៍ និងបដិសណ្ឋារកិច្ច ដើម្បីឆ្លើយតបទៅនឹងតម្រូវការទីផ្សារការងារដែលកំពុងមានកំណើនឡើងវិញប្រកបដោយភាពប្រកួតប្រជែងខ្ពស់។
សិក្ខាកាមទាំងអស់នឹងទទួលបានទាំងចំណេះដឹងទ្រឹស្តី និងការអនុវត្តផ្ទាល់លើបច្ចេកទេសនៃការឆុងកាហ្វេកម្រិតស្តង់ដារ ព្រមទាំងការគ្រប់គ្រងសេវាកម្មភេសជ្ជៈ ដើម្បីធានាថាពួកគាត់អាចយកទៅពង្រីកការបង្រៀនបន្តដល់អ្នកសិក្សាដទៃទៀតនៅតាមមូលដ្ឋានគោលដៅរៀងៗខ្លួនបានយ៉ាងល្អប្រសើរ។
