ខេត្តសៀមរាប៖ បន្ទាប់ពីអញ្ជើញជាអធិបតីក្នុងពិធីបិទ «កម្មវិធីហាត់ការវិជ្ជាជីវៈតាមមូលដ្ឋានអាជីវកម្មសម្រាប់ខេត្តគោលដៅរបស់កម្មវិធីអភិវឌ្ឍន៍ជំនាញ» រួចមក ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ដឹកនាំគណៈប្រតិភូក្រសួងទេសចរណ៍ បានអញ្ជើញទស្សនកិច្ចនៅសាលាសណ្ឋាគារ និងទេសចរណ៍ប៉ូលឌុយប្រ៊ូល ក្នុងគោលបំណងស្វែងយល់ពីដំណើរការបណ្តុះបណ្តាល សមិទ្ធផល បញ្ហាប្រឈម និងទិសដៅអភិវឌ្ឍន៍របស់សាលា ព្រមទាំងពិនិត្យលទ្ធភាពពង្រឹង និងពង្រីកកិច្ចសហប្រតិបត្តិការលើការបណ្តុះបណ្តាលធនធានមនុស្សប្រកបដោយគុណភាព ស្របតាមស្តង់ដាសមត្ថភាពអាស៊ាន និងតម្រូវការជាក់ស្តែងរបស់ទីផ្សារការងារក្នុងវិស័យទេសចរណ៍។
ក្នុងឱកាសទស្សនកិច្ចនេះ ឯកឧត្តមរដ្ឋមន្ត្រី បានស្តាប់បទបង្ហាញអំពីប្រវត្តិ បេសកកម្ម ចក្ខុវិស័យ ទិសដៅ និងសកម្មភាពសំខាន់ៗរបស់សាលា ក្នុងការបណ្តុះបណ្តាលជំនាញបច្ចេកទេស និងវិជ្ជាជីវៈ ជាពិសេសជំនាញពាក់ព័ន្ធនឹងសេវាកម្មទេសចរណ៍ និងបដិសណ្ឋារកិច្ច រួមមាន ជំនាញការិយាល័យជួរមុខ និងគេហកិច្ច ទីភ្នាក់ងារ និងការីទេសចរណ៍ សេវាកម្មម្ហូបអាហារ និងភេសជ្ជៈ ចុងភៅ និងដុតនំ។
ឯកឧត្តមរដ្ឋមន្ត្រី ក៏បានអញ្ជើញពិនិត្យថ្នាក់រៀន ទីកន្លែងអនុវត្តជាក់ស្តែង បរិក្ខារបណ្តុះបណ្តាល និងបរិវេណសាលា ព្រមទាំងសំណេះសំណាលជាមួយគណៈគ្រប់គ្រង គ្រូបណ្តុះបណ្តាល និងសិក្ខាកាម ដើម្បីស្វែងយល់ដោយផ្ទាល់អំពីគុណភាពកម្មវិធីសិក្សា ការហាត់ការតាមមូលដ្ឋានអាជីវកម្ម និងការត្រៀមខ្លួនរបស់សិក្ខាកាមសម្រាប់ចូលទៅក្នុងទីផ្សារការងារ។
ជាមួយគ្នានេះ ឯកឧត្តមរដ្ឋមន្ត្រី ក៏បានវាយតម្លៃខ្ពស់ និងកោតសរសើរចំពោះគណៈគ្រប់គ្រង គ្រូបណ្តុះបណ្តាល និងដៃគូពាក់ព័ន្ធ ដែលបានរួមចំណែកបណ្តុះបណ្តាលយុវជនកម្ពុជាឱ្យមានចំណេះដឹង សមត្ថភាព ជំនាញវិជ្ជាជីវៈ ក្រមសីលធម៌ និងឥរិយាបថការងារល្អ ព្រមទាំងបានបង្កើតឱកាសការងារ និងមុខរបរសមរម្យជូនពួកគេផងដែរ ជាពិសេសឯកឧត្តមរដ្ឋមន្ត្រី ក៏បានកោតសរសើរចំពោះការដឹកនាំរបស់លោកនាយកសាលា និង សហការី គ្រប់ផ្នែក គ្រប់ថ្នាក់ ដែលបានចូលរួមនៅក្នុងការបណ្តុះបណ្តាល និងកសាងកម្លាំងពលកម្មនៅក្នុងឧស្សាហកម្មទេសចរណ៍ ដែលចាប់តាំងពីឆ្នាំ២០០២មក សាលាបានបណ្តុះបណ្តាលអ្នកជំនាញទេសចរណ៍ ជាង ៦.០០០នាក់។
សាលាសណ្ឋាគារ និង ទេសចរណ៍ប៉ូលឌុល ប្រូ ខេត្តសៀមរាប, ព្រឹកថ្ងៃទី១៧ ខែកញ្ញា ឆ្នាំ២០២៦
