ខេត្តសៀមរាប៖ នាព្រឹកថ្ងៃទី២៦ ខែសីហា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ឯកឧត្តម ប៉ាក់ សុខុម រដ្ឋលេខាធិការ និងជាប្រធានគណៈកម្មការគ្រប់គ្រងគម្រោងហូការនៃក្រសួងទេសចរណ៍ រួមជាមួយ ឯកឧត្តមបណ្ឌិត ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ង៉ូវ សេងកាក់ អភិបាលរងនៃគណៈអភិបាលខេត្តសៀមរាប បានអញ្ជើញជាអធិបតីក្នុង ពិធីចែកវិញ្ញាបនបត្របញ្ចប់ការបណ្តុះបណ្តាលវិជ្ជាជីវៈជំនាញបដិសណ្ឋារកិច្ចដល់សិក្ខាកាមជ័យលាភី របស់សាលាសណ្ឋាគារ សាលាបាយ ឆ្នាំសិក្សា ២០២៥-២០២៦។
កម្មវិធីនេះមានការអញ្ជើញចូលរួមពីសំណាក់ លោកបណ្ឌិតប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ លោកប្រធានមន្ទីរទេសចរណ៍ខេត្តសៀមរាប លោកនាយកសាលាសណ្ឋាគារ សាលាបាយ តំណាងមូលនិធិអភិវឌ្ឍន៍ជំនាញ(SDF) តំណាងមន្ទីរអង្គភាព សមាគម សណ្ឋាគារ មាតាបិតា សិក្ខាកាម លោកគ្រូ អ្នកគ្រូ សរុបប្រមាណជាង ៣០០នាក់។
ថ្លែងក្នុងពិធី ឯកឧត្តមរដ្ឋលេខាធិការ បានមានប្រសាសន៍ថា ការអភិវឌ្ឍមូលធនមនុស្សក្នុងវិស័យទេសចរណ៍ ចាំបាច់ត្រូវមានការចូលរួមពីគ្រប់តួអង្គពាក់ព័ន្ធនៅក្នុងវិស័យទេសចរណ៍ រួមទាំងផ្នែករដ្ឋ និងផ្នែកឯកជន ដើម្បីរួមគ្នាបង្កើតប្រព័ន្ធអភិវឌ្ឍជំនាញមួយដែលមានគុណភាព ឆ្លើយតបទៅនឹងតម្រូវការជាក់ស្តែងរបស់ទីផ្សារការងារ និងការវិវត្តនៃឧស្សាហកម្មទេសចរណ៍។ ក្នុងន័យនេះ សាលាបណ្តុះបណ្តាលវិជ្ជាជីវៈទេសចរណ៍នានាក្នុងខេត្តសៀមរាប បានចូលរួមយ៉ាងសកម្មក្នុងការលើកកម្ពស់គុណភាពបណ្តុះបណ្តាល តាមរយៈការបញ្ចូលកម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa) និងកម្មវិធីសិក្សាគុណវុឌ្ឍិអាស៊ាន (ASEAN MRA-TP) ទៅក្នុងកម្មវិធីបណ្តុះបណ្តាលរបស់ខ្លួន ព្រមទាំងមានគំនិតផ្តួចផ្តើមប្រកបដោយនវានុវត្តន៍ ដោយបានអភិវឌ្ឍកម្មវិធី HoKa និងកម្មវិធីសិក្សាអាស៊ាន ទៅជាកម្មវិធីបណ្តុះបណ្តាលពេញម៉ោង និងបានផ្តល់ការបណ្តុះបណ្តាលជំនាញដល់យុវជនកម្ពុជារាប់រយនាក់នៅក្នុងខេត្តសៀមរាប។ ជាក់ស្តែង សាលាសណ្ឋាគារ និងសាលាបាយ បាននិងកំពុងអនុវត្តកម្មវិធីសិក្សាអាស៊ាន កម្រិតអាស៊ានទី១ សម្រាប់វិញ្ញាបនបត្រវិជ្ជាជីវៈកម្រិត២ (Cert 2) ដែលតម្រូវឱ្យសិស្សសិក្សាយ៉ាងតិចចំនួន ២៣ ឯកតាសមត្ថភាព ស្របតាមស្តង់ដារសមត្ថភាពវិជ្ជាជីវៈទេសចរណ៍អាស៊ាន។ ការអនុវត្តនេះ គឺជាគំរូដ៏សំខាន់មួយនៃកិច្ចសហការរវាងស្ថាប័នរដ្ឋ ស្ថាប័នបណ្តុះបណ្តាល និងវិស័យឯកជន ក្នុងការធានាគុណភាពជំនាញវិជ្ជាជីវៈ និងបង្កើតធនធានមនុស្សដែលមានសមត្ថភាព ស្របតាមតម្រូវការទីផ្សារការងារ និងអាចប្រកួតប្រជែងបានក្នុងកម្រិតជាតិ និងតំបន់អាស៊ាន។
សិក្ខាកាមដែលបានបញ្ជប់ការសិក្សាដោយជោគជ័យ ដែលនឹងត្រូវទទួលនូវវិញ្ញាបនបត្រមានចំនួន ១៥០រូប ដែលបានបញ្ចប់ការសិក្សាជំនាញបដិសណ្ឋារកិច្ច ស្របតាមស្តង់ដាសមត្ថភាពអាស៊ានក្នុងក្របខណ្ឌ ASEAN MRA-TP លើគុណវុឌ្ឍិវិញ្ញាបនបត្រ ២ (Certification II) ពីសាលាសណ្ឋាគារ សាលាបាយ ខេត្តសៀមរាប និងទទួលបានសហហិរញ្ញប្បទានពី មូលនិធិអភិវឌ្ឍន៍ជំនាញ Skills Development Fund
គួរបញ្ជាក់ផងដែរថា សាលាសណ្ឋាគារ សាលាបាយ ជាសាលាដែលបានអនុវត្តកម្មវិធីបណ្តុះបណ្តាលស្របតាមស្តង់ដាសមត្ថភាពអាស៊ាន ASEAN MRA-TP ដោយមានការអនុញ្ញាតពីក្រសួងទេសចរណ៍ អស់រយៈពេល២៤ ឆ្នាំកន្លងមកគិតចាប់ពីឆ្នាំ២០០២-២០២៦ ដោយមានសិក្ខាកាមបញ្ជប់ការសិក្សាសរុប ២២០០នាក់។
