ក្រសួងទេសចរណ៍ជំរុញការអភិវឌ្ឍប្រព័ន្ធ CTPRS ដើម្បីបម្រើជាប្រយោជន៍ដល់ការគ្រប់គ្រង និងការអភិវឌ្ឍធនធានមនុស្សក្នុងវិស័យទេសចរណ៍!!

ទីស្តីការក្រសួងទេសចរណ៍៖ នៅរសៀសថ្ងៃទី២៣ ខែកញ្ញា ឆ្នាំ២០២៦ លោកជំទាវ វណ្ណ សេរីរ័ត្ន អនុរដ្ឋលេខាធិការក្រសួងទេសចរណ៍ អញ្ចើញជាអធិបតីដឹកនាំកិច្ចប្រជុំពិនិត្យមើលប្រព័ន្ធចុះបញ្ជីអ្នកជំនាញទេសចរណ៍កម្ពុជា (CTPRS)។

កិច្ចប្រជុំនេះក៏មានការអញ្ចើញចូលរួមពីសំណាក់ ឯកឧត្តមអគ្គនាយកគ្រប់គ្រងឧស្សាហកម្មទេសចរណ៍ លោកបណ្ឌិតប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ លោកប្រធាននាយកដ្ឋានគ្រប់គ្រងទីភ្នាក់ងារ ដឹកជញ្ជូន និងមគ្គុទ្ទេសក៍ទេសចរណ៍ លោក លោកស្រីអនុប្រធាននាយកដ្ឋាន លោក លោកស្រី ប្រធានការិយាល័យ មន្ត្រីជំនាញ នៃអគ្គនាយកដ្ឋានគ្រប់គ្រងឧស្សាហកម្មទេសចរណ៍ប្រមាណ ២៥រូប។

ថ្លែងក្នុងកិច្ចប្រជុំ លោកជំទាវអនុរដ្ឋលេខាធិការ បានមានប្រសាសន៍ថា ការពិនិត្យ និងកែលម្អប្រព័ន្ធចុះបញ្ជីអ្នកជំនាញទេសចរណ៍កម្ពុជា (CTPRS) គឺជាការងារដ៏មានសារៈសំខាន់ក្នុងការពង្រឹងប្រព័ន្ធគ្រប់គ្រងអ្នកជំនាញក្នុងវិស័យទេសចរណ៍ឱ្យកាន់តែមានប្រសិទ្ធភាព តម្លាភាព និងស្របតាមការវិវឌ្ឍនៃបច្ចេកវិទ្យាឌីជីថល។

គួរបញ្ជាក់ផងដែរថាប្រព័ន្ធ CTPRS ត្រូវបានបង្កើតឡើងដោយមានគោលបំណងចម្បងៗដូចជា៖
១.បង្កើតប្រព័ន្ធគ្រប់គ្រងទិន្នន័យកណ្តាល (Centralized Registration Platform)៖ ចុះបញ្ជី និងផ្តល់អត្តលេខដល់អ្នកជំនាញទេសចរណ៍ គ្រូបង្គោល អ្នកវាយតម្លៃបង្គោល ព្រមទាំងទទួលស្គាល់សាលាវិជ្ជាជីវៈទេសចរណ៍ និងកម្មវិធីសិក្សាជាផ្លូវការ។
២.ពង្រឹងការអភិវឌ្ឍសមត្ថភាព (Capacity Building & Self-Learning)៖ ផ្តល់វេទិកាស្វ័យសិក្សាលើជំនាញស្របតាមកម្មវិធីសិក្សា ហូកា ជាតិ និងអាស៊ាន សម្រាប់សេវាកម្មសណ្ឋាគារ ការធ្វើដំណើរ និង ជំនាញស្ប៉ានិងសុខុមាលភាព។
៣.បង្កើនទំនុកចិត្ត និងសុវត្ថិភាពទិន្នន័យ (Verification System)៖ បង្កើតមុខងារផ្ទៀងផ្ទាត់ (Verify) តាមរយៈ QR Code លើវិញ្ញាបនបត្រ និងអត្តលេខអ្នកជំនាញ។
៤.ជំរុញ និងផ្គូរផ្គងទីផ្សារការងារ (Job Market Matching)៖ ផ្តល់ផ្លែតហ្វមសម្រាប់ការប្រកាសស្វែងរកបុគ្គលិក និងការស្វែងរកការងារដែលតភ្ជាប់រវាងវិស័យឯកជន អ្នកជំនាញ/សិស្ស-និស្សិត និងគ្រឹះស្ថានបណ្តុះបណ្តាល។
៥.សម្រួលការធ្វើរបាយការណ៍ និងគ្រប់គ្រង (Reporting Automation)៖ ជួយដល់មន្ទីរទេសចរណ៍រាជធានី-ខេត្ត ក្នុងការប្រមូល និងរាយការណ៍ទិន្នន័យកម្លាំងពលកម្មប្រចាំខែជូនក្រសួងបានទាន់ពេលវេលា។
៦.ពង្រឹងប្រព័ន្ធទំនាក់ទំនង (CRM & Multichannel Notification)៖ បង្កើនប្រសិទ្ធភាពទំនាក់ទំនងរវាងគ្រប់ភាគីពាក់ព័ន្ធតាមរយៈ SMS, Email, Telegram និង Notification។

ជាទីបញ្ចប់ លោកជំទាវអនុរដ្ឋលេខាធិការ បានថ្លែងកោតសរសើរក្រុមការងារ ព្រមទាំងណែនាំឱ្យក្រុមការងារជំនាញបន្តពិនិត្យលើមុខងារ ទិន្នន័យ និងដំណើរការនៃប្រព័ន្ធ ដោយធានាឱ្យការចុះបញ្ជី ការធ្វើបច្ចុប្បន្នភាពព័ត៌មាន និងការគ្រប់គ្រងទិន្នន័យអ្នកជំនាញទេសចរណ៍ ប្រព្រឹត្តទៅបានងាយស្រួល រហ័ស ត្រឹមត្រូវ និងមានសុវត្ថិភាព។ ជាមួយគ្នានេះ ត្រូវពង្រឹងការសម្របសម្រួលរវាងអង្គភាពពាក់ព័ន្ធ ដើម្បីធានាឱ្យទិន្នន័យក្នុងប្រព័ន្ធមានភាពពេញលេញ និងអាចប្រើប្រាស់ជាមូលដ្ឋានសម្រាប់ការគ្រប់គ្រង ការរៀបចំផែនការ និងការអភិវឌ្ឍធនធានមនុស្សក្នុងវិស័យទេសចរណ៍។

ការអភិវឌ្ឍប្រព័ន្ធ CTPRS គឺជាជំហានដ៏សំខាន់មួយក្នុងការជំរុញបរិវត្តកម្មឌីជីថលក្នុងវិស័យទេសចរណ៍ ស្របតាមទិសដៅរបស់រាជរដ្ឋាភិបាល និងផែនការអភិវឌ្ឍធនធានមនុស្សរបស់ក្រសួងទេសចរណ៍។ ប្រព័ន្ធនេះនឹងរួមចំណែកលើកកម្ពស់ប្រសិទ្ធភាពនៃការគ្រប់គ្រងអ្នកជំនាញទេសចរណ៍ ពង្រឹងគុណភាពនៃការបណ្តុះបណ្តាល និងការទទួលស្គាល់សមត្ថភាពវិជ្ជាជីវៈ ព្រមទាំងផ្តល់ទិន្នន័យដែលមានភាពជឿជាក់សម្រាប់ការរៀបចំគោលនយោបាយ ការធ្វើផែនការ និងការអភិវឌ្ឍវិស័យទេសចរណ៍ប្រកបដោយចីរភាព និងភាពប្រកួតប្រជែង។