ខេត្តបន្ទាយមានជ័យ៖ នាព្រឹកថ្ងៃទី១៥ ខែតុលា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ លោកបណ្ឌិត ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាប្រធានលេខាធិការដ្ឋានគណៈកម្មការជាតិអ្នកជំនាញទេសចរណ៍ រួមជាមួយ លោក ហាប់ ហោន (តូនី) អគ្គនាយកក្រុមហ៊ុន ភី.អេស ហសភីថលលីធី ឯ.ក (P.S Hospitality Group) អញ្ជើញជាអធិបតីបើកវគ្គបណ្តុះបណ្តាលស្តីពី «សេវាកម្មប្រណីត ជំនាញសេវាកម្មសណ្ឋាគារ» ដែលសិក្សាចាប់ពីថ្ងៃទី១៥-១៦ ខែតុលា ឆ្នាំ២០២៦ នៅក្រុងប៉ោយប៉ែត ខេត្តបន្ទាយមានជ័យ។
ពិធីបើកវគ្គបណ្តុះបណ្តាលក៏មានការអញ្ជើញចូលរួមពីសំណាក់ លោកអនុប្រធាននាយកដ្ឋាន លោកអនុប្រធានមន្ទីរទេសចរណ៍ខេត្តបន្ទាយមានជ័យ តំណាងមន្ទីរទេសចរណ៍ មន្រ្តីក្រសួងទេសចរណ៍ លោក/លោកស្រី ប្រធានផ្នែក បុគ្គលិកក្រុមហ៊ុន ភី.អេស ហសភីថលលីធី ឯ.ក (P.S Hospitality Group) ប្រមាណ ៤០នាក់។
ថ្លែងក្នុងពិធីបើកវគ្គ លោកបណ្ឌិតប្រធាននាយកដ្ឋាន បានមានប្រសាសន៍ថាការបណ្តុះបណ្តាលនេះមានសារៈសំខាន់ក្នុងការពង្រឹងសមត្ថភាព និងលើកកម្ពស់ចំណេះដឹង ជំនាញ និងឥរិយាបថវិជ្ជាជីវៈរបស់បុគ្គលិកដែលបម្រើការក្នុងវិស័យសណ្ឋាគារ ជាពិសេសជំនាញផ្តល់សេវាកម្មប្រកបដោយភាពប្រណីត សុភាពរាបសា យកចិត្តទុកដាក់ និងស្របតាមស្តង់ដារវិជ្ជាជីវៈ។ លោកបណ្ឌិតបានបន្ថែមថា ការអភិវឌ្ឍធនធានមនុស្សប្រកបដោយសមត្ថភាព និងវិជ្ជាជីវៈ គឺជាកត្តាគន្លឹះក្នុងការលើកកម្ពស់គុណភាពសេវាកម្មទេសចរណ៍ បង្កើនភាពប្រកួតប្រជែង និងពង្រឹងទំនុកចិត្តរបស់ភ្ញៀវទេសចរ។ ជាមួយគ្នានេះ លោកបណ្ឌិតបានលើកទឹកចិត្តដល់សិក្ខាកាមទាំងអស់ឱ្យយកចិត្តទុកដាក់សិក្សា ផ្លាស់ប្តូរបទពិសោធន៍ និងចាប់យកចំណេះដឹងថ្មីៗពីគ្រូបណ្តុះបណ្តាល ដើម្បីយកទៅអនុវត្តជាក់ស្តែងនៅតាមមូលដ្ឋានអាជីវកម្មរៀងៗខ្លួន រួមចំណែកលើកកម្ពស់គុណភាពសេវាកម្មសណ្ឋាគារ និងការអភិវឌ្ឍវិស័យទេសចរណ៍កម្ពុជាឱ្យកាន់តែមានភាពរីកចម្រើន និងប្រកបដោយចីរភាព។
គួរបញ្ជាក់ផងដែរថាតាមរយៈគណៈកម្មការគ្រប់គ្រងគម្រោងហូកានៃក្រសួងទេសចរណ៍ ដែលមានមន្ទីរទេសចរណ៍ខេត្តបន្ទាយមានជ័យ ជាសេនាធិការ បានបើកវគ្គបណ្តុះបណ្តាលចំនួន ៦វគ្គរួចមកហើយសម្រាប់ក្រុងប៉ោយប៉ែតលើជំនាញដូចជា៖ ជំនាញការិយាល័យជួរមុខ ជំនាញសេវាកម្មម្ហូបអាហារ និងភេសជ្ជៈ ជំនាញគេហកិច្ច ជំនាញចុងភៅ និងជំនាញឆុងកាហ្វេកម្រិតដំបូង។
ក្រុមហ៊ុន ភី.អេស ហសភីថលលីធី ឯ.ក (P.S Hospitality Group) មានទីតាំងនៅក្រុងប៉ោយប៉ែត ខេត្តបន្ទាយមានជ័យ ត្រូវបានបង្កើតឡើង និងចាប់ផ្តើមប្រតិបត្តិការនៅឆ្នាំ ២០២៤ ជាក្រុមហ៊ុនកម្ពុជាដែលគ្រប់គ្រង និងប្រតិបត្តិការដោយម្ចាស់អាជីវកម្មក្នុងស្រុក ដោយមានអាជីវកម្មចម្រុះក្នុងវិស័យ បដិសណ្ឋារកិច្ច រួមមាន៖ សណ្ឋាគារ, ភោជនីយដ្ឋាន ហាងកាហ្វេ, សេវាកម្មម្ហូបអាហារ, អាជីវកម្មលក់សម្លៀកបំពាក់, ទីលានវាយកូនហ្គោល, ការអភិវឌ្ឍ និងលក់វីឡា ព្រមទាំងសេវាកម្មស្នាក់នៅវីឡាឯកជន។ បច្ចុប្បន្ន P.S Hospitality Group មានបុគ្គលិកប្រមាណ ៤៩០នាក់ ដែលកំពុងបម្រើការងារនៅតាមអាជីវកម្ម និងប្រតិបត្តិការផ្សេងៗរបស់ក្រុមហ៊ុន។
