លើកកម្ពស់វិស័យម្ហូបអាហារ (Gastronomy) តាមរយៈការពង្រឹងសមត្ថភាពអ្នកជំនាញទេសចរណ៍ និងគ្រូបង្គោល ហូកា (HoKa) លើជំនាញចុងភៅ!
ខេត្តសៀមរាប៖ នាព្រឹកថ្ងៃទី២៤ ខែកុម្ភៈ ឆ្នាំ២០២៥ ដោយការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានគណៈកម្មាធិការគ្រប់គ្រងគម្រោងហូកា (HoKa) រួមជាមួយ លោក ង៉ូវ សេងកាក់ អភិបាលរងខេត្តសៀមរាប និង លោក គង់ ដារ៉ា ប្រធានកម្មវិធីបណ្តុះបណ្តាលនៃអង្គការ Swisscontact បានអញ្ជើញជាអធិបតីក្នុងពិធីបើកវគ្គបណ្តុះបណ្តាលគ្រូបង្គោលហូកា ជំនាញចុងភៅ។ ពិធីនេះត្រូវបានរៀបចំឡើងនៅថ្នាក់ធ្វើម្ហូបសុភ័ស សង្កាត់ជ្រាវ ក្រុងសៀមរាប ដោយមានការចូលរួមពីតំណាងគ្រឹះស្ថាន TVET សមាគមឧស្សាហកម្មទេសចរណ៍ សណ្ឋាគារ ភោជនីយដ្ឋាន សមាគមចុងភៅកម្ពុជា និងសិក្ខាកាមសរុបចំនួន ៤០ រូប។
វគ្គបណ្តុះបណ្តាលនេះរៀបចំឡើងក្នុងគោលបំណងពង្រឹងសមត្ថភាពបច្ចេកទេស និងវិធីសាស្ត្របង្រៀនដល់អ្នកជំនាញចុងភៅនៅតាមខេត្តគោលដៅ ដើម្បីផ្តល់លទ្ធភាពឱ្យពួកគាត់អាចបណ្តុះបណ្តាលបន្តដល់បុគ្គលិកជំនាញក្នុងមូលដ្ឋានរៀងៗខ្លួន។ កម្មវិធីនេះមានរយៈពេល ៩ ថ្ងៃ ដែលរួមមានការសិក្សាទ្រឹស្តីរយៈពេល ៥ ថ្ងៃតាមប្រព័ន្ធវីដេអូ (Online) និងការអនុវត្តផ្ទាល់រយៈពេល ៤ ថ្ងៃ ផ្តោតលើមុខម្ហូបអត្តសញ្ញាណតាមតំបន់ និងបច្ចេកទេសធ្វើទឹកជ្រលក់ផ្សេងៗ។
សម្រាប់វគ្គទី១ នេះ មានសិក្ខាកាមសរុបចំនួន ១៧ រូប អញ្ជើញមកពីខេត្តគោលដៅចំនួន ៨ រួមមាន៖ ក្រចេះ ស្ទឹងត្រែង ព្រះវិហារ មណ្ឌលគិរី រតនគិរី បន្ទាយមានជ័យ ឧត្តរមានជ័យ និងកំពង់ឆ្នាំង ដែលសមាសភាពរួមមានគ្រូបង្គោលហូកាមកពីមន្ទីរទេសចរណ៍ខេត្ត និងវិស័យឯកជន។
