ខេត្តសៀមរាប៖ នាព្រឹកថ្ងៃទី១៩ ខែតុលា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ឯកឧត្តម ឈុន មករា អគ្គនាយកគ្រប់គ្រងឧស្សាហកម្មទេសចរណ៍ អមដំណេីរដោយលោកបណ្ឌិតប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងមន្ត្រីជំនាញនៃនាយកដ្ឋាន បានចុះត្រួតពិនិត្យហេដ្ឋារចនាសម្ព័ន្ធទន់ និងរឹង របស់អង្គការ បាយ័ន ដើម្បីការអប់រំ និងអភិវឌ្ឍ មុននឹងរៀបចំដំណើរការវាយតម្លៃទទួលស្គាល់ជាសាលាបណ្តុះបណ្តាលជំនាញវិជ្ជាជីវៈទេសចរណ៍ និងពង្រឹងកិច្ចសហការលើការបណ្តុះបណ្តាលជំនាញវិជ្ជាជីវៈទេសចរណ៍នៅខេត្តសៀមរាប។
ការចុះត្រួតពិនិត្យនេះមានគោលបំណងពិនិត្យមើលស្ថានភាពជាក់ស្តែងនៃហេដ្ឋារចនាសម្ព័ន្ធ សម្ភារៈបរិក្ខារ បរិយាកាសសិក្សា និងលទ្ធភាពក្នុងការរៀបចំការបណ្តុះបណ្តាលជំនាញវិជ្ជាជីវៈទេសចរណ៍ ឱ្យមានគុណភាព និងឆ្លើយតបនឹងតម្រូវការជាក់ស្តែងរបស់ទីផ្សារការងារ។ ទន្ទឹមនឹងនេះ ក៏ជាឱកាសសម្រាប់ភាគីពាក់ព័ន្ធពិភាក្សា និងស្វែងរកលទ្ធភាពពង្រឹងកិច្ចសហការលើការរៀបចំកម្មវិធីបណ្តុះបណ្តាល ការអភិវឌ្ឍសមត្ថភាពគ្រូបណ្តុះបណ្តាល និងការបង្កើនឱកាសទទួលបានជំនាញវិជ្ជាជីវៈសម្រាប់យុវជន និងប្រជាពលរដ្ឋនៅក្នុងមូលដ្ឋានឦ។
គួរបញ្ជាក់ផងដែរថា បេសកកម្មរបស់សាលាផ្ដល់ការគាំពារលើការសិក្សាពេញមួយជីវិត អ្នកជំនាញវិជ្ជាជីវៈពិតប្រាកដ និងជាពលរដ្ឋដែលមាន ទំនួលខុសត្រូវសង្គម លើសពីនេះគឺតាមរយៈការផ្ដល់ការអប់រំទូលំទូលាយ ការពង្រឹងជំនាញវិជ្ជាជីវៈ ការជួយគាំទ្រសុខមាលភាព ការអភិវឌ្ឍន៍សង្គម។ ជំនាញស្នូលដែលសាលាផ្តល់ការបណ្តុះបណ្តាលជាប្រចាំរួមមាន៖
១.ជំនាញដុតនំ និងធ្វើបង្អែម (Pastry & Bakery) តាមស្តង់ដាបច្ចេកទេសបារាំង និងអន្តរជាតិ
២.ជំនាញការងារឆុង និងរចនាកាហ្វេ (Coffee Shop & Barista) ដែលមានរយៈពេលសិក្សាសរុប ៨១០ ម៉ោង
៣.ជំនាញកែច្នៃបន្លែ និងផ្លែឈើ (Fruit and Vegetable Processing)
៤.ជំនាញកសិ-បរិស្ថានវិទ្យា និងកសិកម្មបៃតង (Green Agroecology)។
ក្នុងរយៈពេលប៉ុន្មានឆ្នាំកន្លងមកនេះ សាលាបានបណ្តុះបណ្តាលយុវតីមកពីគ្រួសារក្រីក្រ លេីជំនាញដុតនំចំនួន ២១៤នាក់។
