ខេត្តសៀមរាប៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍ បានអញ្ជើញជាអធិបតីក្នុងពិធីបិទ «វគ្គបណ្តុះបណ្តាលផ្នែកបដិសណ្ឋារកិច្ចដល់សិក្ខាកាមចំនួន ២០០នាក់ របស់សមាគមក្លឹបទេសចរណ៍ សៀមរាប»។
ពិធីនេះមានការអញ្ជើញចូលរួមពីឯកឧត្តម ង៉ូវ សេងកាក់ អភិបាលរងនៃគណៈអភិបាលខេត្តសៀមរាប, លោក សែត កៅ ប្រធានសមាគមក្លឹបទេសចរណ៍ សៀមរាប, ឯកឧត្តម គី សុខគីម នាយកប្រតិបត្តិនៃមូលនិធិអភិវឌ្ឍន៍ជំនាញ (SDF), ឯកឧត្តមបណ្ឌិត សុខ តុញ អនុប្រធានក្រុមប្រឹក្សាភិបាលនៃសាកលវិទ្យាល័យអង្គរ, ឯកឧត្តម លោកជំទាវថ្នាក់ដឹកនាំក្រសួងទេសចរណ៍ តំណាងប្រតិបត្តិករទេសចរណ៍ សមាគមទេសចរណ៍ គ្រឹះស្ថានបណ្តុះបណ្តាល លោកគ្រូ អ្នកគ្រូ និងសិក្ខាកាមប្រមាណ ៥០០នាក់។
ថ្លែងក្នុងឱកាសនេះ ឯកឧត្តមរដ្ឋមន្ត្រី បានសម្តែងនូវការកោតសរសើរ និងវាយតម្លៃខ្ពស់ចំពោះរដ្ឋបាលខេត្តសៀមរាប ដែលតែងតែផ្តល់ការគាំទ្រ និងសហការយ៉ាងជិតស្និទ្ធជាមួយក្រសួងទេសចរណ៍ ក្នុងការជំរុញការអភិវឌ្ឍវិស័យទេសចរណ៍ ជាពិសេសការអនុវត្ត «ផែនការអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៦–២០៣០»។ ជាមួយគ្នានេះ ឯកឧត្តមរដ្ឋមន្ត្រី ក៏បានកោតសរសើរចំពោះសមាគមក្លឹបទេសចរណ៍ សៀមរាប ដែលបានខិតខំបណ្តុះបណ្តាលយុវជនក្រីក្រ ងាយរងគ្រោះ និងអ្នកជំនាញទេសចរណ៍ សរុបចំនួន ៧០០នាក់ ចាប់ពីឆ្នាំ២០២៣ ដល់ឆ្នាំ២០២៦ ស្របតាមកម្មវិធីបណ្តុះបណ្តាលហូកា និងស្តង់ដាសមត្ថភាពអាស៊ាន។
ជាមួយគ្នានេះ ឯកឧត្តមរដ្ឋមន្ត្រី បានគូសបញ្ជាក់ថា វិស័យទេសចរណ៍កម្ពុជាអាចបណ្តុះបណ្តាលធនធានមនុស្សថ្មីបានប្រមាណជាង ២.៥០០នាក់ក្នុងមួយឆ្នាំ ដែលនៅមិនទាន់ឆ្លើយតបនឹងតម្រូវការកម្លាំងពលកម្មក្នុងវិស័យនេះនៅឡើយ។ ឯកឧត្តមរដ្ឋមន្ត្រី បានគូសបញ្ជាក់បន្ថែមថា មូលនិធិអភិវឌ្ឍន៍ជំនាញបានគាំទ្រសហហិរញ្ញប្បទានក្នុងការកសាងសមត្ថភាពដល់យុវជនកម្ពុជាចំនួន ៩១.៦៣៦នាក់ ក្នុងនោះមានសិក្ខាកាមក្នុងវិស័យទេសចរណ៍ចំនួន ៨ ៥០៤នាក់។
ឯកឧត្តមរដ្ឋមន្ត្រី បានសង្កត់ធ្ងន់ថា ការអភិវឌ្ឍមូលធនមនុស្សក្នុងវិស័យទេសចរណ៍ គឺជាការងារអាទិភាព ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល ដែលកំណត់ «មនុស្ស» ជាអាទិភាពទី១ និងគោលដៅ «ប្រជាពលរដ្ឋម្នាក់មានជំនាញមួយយ៉ាងតិចប្រចាំជីវិត» ព្រមទាំងអភិក្រម «រៀនឱ្យចេះ រៀនឱ្យចប់ រៀនឱ្យមានការងារធ្វើ»។ ជាក់ស្តែង ក្រសួងទេសចរណ៍បានបណ្តុះបណ្តាលគ្រូបង្គោល និងអ្នកវាយតម្លៃបង្គោលអាស៊ានចំនួន ៣០រូប បណ្តុះបណ្តាលបន្តដល់គ្រូបង្គោលជាតិ និងអ្នកវាយតម្លៃបង្គោលជាតិជាង ៨០០រូប ព្រមទាំងទទួលស្គាល់សាលាបណ្តុះបណ្តាលជំនាញវិជ្ជាជីវៈទេសចរណ៍ចំនួន ៩ទីតាំង ក្នុងនោះមាន ៤ទីតាំង ដែលផ្តល់ការបណ្តុះបណ្តាលគុណវុឌ្ឍិអាស៊ានពេញលេញ។
បន្ថែមពីលើនេះ ឯកឧត្តមរដ្ឋមន្ត្រី បានផ្តល់អនុសាសន៍ដល់មូលនិធិអភិវឌ្ឍន៍ជំនាញ ឱ្យបន្តពង្រីកការគាំទ្រដល់ការបណ្តុះបណ្តាលជំនាញទេសចរណ៍ និងផ្តល់ឱកាសដល់យុវជនក្រីក្រ និងងាយរងគ្រោះ។ គ្រឹះស្ថានបណ្តុះបណ្តាលត្រូវបន្តផ្តល់ឱកាសដល់ស្ត្រី ជនមានពិការភាព និងសិស្សដែលបោះបង់ការសិក្សា ខណៈមូលដ្ឋានអាជីវកម្មទេសចរណ៍ត្រូវជំរុញការបណ្តុះបណ្តាលខាងក្នុង (In-House Training) ដោយប្រើប្រាស់ប្រអប់បណ្តុះបណ្តាលអាស៊ាន និងស្នើសុំការទទួលស្គាល់តាមប្រព័ន្ធ CTPRS។ ជាមួយគ្នានេះ សមាគមទេសចរណ៍ និងសាលាបណ្តុះបណ្តាលត្រូវពង្រឹងកិច្ចសហការនិងសមត្ថភាពគ្រូបង្រៀន ហើយសិក្ខាកាមទាំង ២០០នាក់ ត្រូវបន្តសិក្សាពេញមួយជីវិត និងផ្តល់សេវាកម្មជូនភ្ញៀវទេសចរប្រកបដោយវិជ្ជាជីវៈ និងក្រមសីលធម៌។
សូមជម្រាបជូនថា វគ្គបណ្តុះបណ្តាលផ្នែកបដិសណ្ឋារកិច្ចនេះ ត្រូវបានរៀបចំឡើងដោយសមាគមក្លឹបទេសចរណ៍ សៀមរាប ដោយមានការគាំទ្រពីមូលនិធិអភិវឌ្ឍន៍ជំនាញ និងកិច្ចសហការពីភាគីពាក់ព័ន្ធ ក្នុងគោលបំណងពង្រឹងសមត្ថភាព និងជំនាញវិជ្ជាជីវៈដល់សិក្ខាកាម ដើម្បីឆ្លើយតបនឹងតម្រូវការកម្លាំងពលកម្ម និងលើកកម្ពស់គុណភាពសេវាកម្មក្នុងវិស័យទេសចរណ៍កម្ពុជា។
នៅសាកលវិទ្យាល័យអង្គរ ខេត្តសៀមរាប, ថ្ងៃទី៣០ ខែតុលា ឆ្នាំ២០២៦
