វិទ្យាស្ថានបណ្តុះបណ្តាលវិជ្ជាជីវៈនិងបំណិនជីវិតសុីឡោម នៅឃុំចុងដូង ស្រុកបារាយណ៍ ខេត្តកំពង់ធំ នឹងក្លាយជាមជ្ឈមណ្ឌលបណ្តុះបណ្តាលជំនាញទេសចរណ៍ និង TVET សម្រាប់យុវជន!!

ខេត្តកំពង់ធំ៖ នៅថ្ងៃទី៩ ខែសីហា ឆ្នាំ២០២៦ លោកបណ្ឌិត ជួប រតនា អនុប្រធានក្រុមការងាររាជរដ្ឋាភិបាលចុះជួយឃុំចុងដូង ស្រុកបារាយណ៍ រួមជាមួយសមាជិក សមាជិកា បានអញ្ជើញចុះត្រួតពិនិត្យទីតាំង និងជួបពិភាក្សាការងារជាមួយក្រុមការងារតំណាងអង្គការ ស៊ីឡោមកម្ពុជា ដើម្បីពិនិត្យវឌ្ឍនភាពការសាងសង់ វិទ្យាស្ថានបណ្តុះបណ្តាលវិជ្ជាជីវៈនិងបំណិនជីវិតសុីឡោម ដែលកំពុងសាងសង់នៅភូមិទួលដំណាក់ ឃុំចុងដូង ស្រុកបារាយណ៍ ខេត្តកំពង់ធំ។

ក្នុងឱកាសនេះ លោកបណ្ឌិត បានពិនិត្យវឌ្ឍនភាពនៃការសាងសង់អគារសិក្សា និងពិភាក្សាអំពីការរៀបចំទីតាំង បរិក្ខារ និងលក្ខខណ្ឌចាំបាច់នានា ដើម្បីធានាថា មជ្ឈមណ្ឌលបណ្តុះបណ្តាលនាពេលខាងមុខ អាចផ្តល់ការបណ្តុះបណ្តាលប្រកបដោយគុណភាព ស្របតាមតម្រូវការទីផ្សារការងារ និងការរីកចម្រើននៃវិស័យទេសចរណ៍។ក្រុមការងារបានផ្តល់អនុសាសន៍ឱ្យសាលាលើការរៀបចំកម្មវិធីបណ្តុះបណ្តាល នីតិវិធីជ្រើសរើសសិក្ខាកាម ការបណ្តុះបណ្តាលគ្រូ និងនីតិវិធីចុះឈ្មោះជាសាលាវិជ្ជាជីវៈទេសចរណ៍ផងដែរ។

វិទ្យាស្ថានបណ្តុះបណ្តាលវិជ្ជាជីវៈ នឹងផ្តល់ឱកាសសិក្សាជំនាញវិជ្ជាជីវៈទេសចរណ៍ដល់យុវជនស្រុកបារាយ៍ជាអាទិភាព និងបណ្តាស្រុកនានា លើជំនាញឆុងភៅ សេវាកម្មម្ហូបអាហារនិងភេសជ្ជៈ និងគេហកិច្ច និងជំនាញបច្ចេកទេស TVET មួយចំនួនទៀត។

ការបង្កើតទីតាំងបណ្តុះបណ្តាលនេះ នឹងក្លាយជាឱកាសដ៏មានសារៈសំខាន់សម្រាប់ប្រជាពលរដ្ឋ និងយុវជនដែលមានជីវភាពខ្វះខាត ក្នុងការទទួលបានចំណេះដឹង ជំនាញ និងសមត្ថភាពវិជ្ជាជីវៈ ដើម្បីបង្កើនឱកាសទទួលបានការងារធ្វើ បង្កើនប្រាក់ចំណូល និងលើកកម្ពស់ជីវភាពគ្រួសារ។