ក្រសួងទេសចរណ៍ សហការជាមួយមជ្ឈមណ្ឌល B-Hub Barista Training Centre បើកវគ្គបណ្តុះបណ្តាលជំនាញឆុងកាហ្វេ (Barista) កម្រិតដំបូង ឥតគិតថ្លៃ សម្រាប់វគ្គទី២ នៅរាជធានីភ្នំពេញ!
រាជធានីភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងការណែនាំផ្ទាល់ពី លោក ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ នាព្រឹកថ្ងៃទី១៩ ខែកុម្ភៈ ឆ្នាំ២០២៦ នៅមជ្ឈមណ្ឌលបណ្តុះបណ្តាល B-Hub Barista Training Centre លោកបណ្ឌិត គឹម ប៊ុនណារ៉ា អនុប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលឥតគិតថ្លៃលើជំនាញឆុងកាហ្វេ (Barista) កម្រិតដំបូង សម្រាប់វគ្គទី២។ ពិធីនេះមានការចូលរួមពីថ្នាក់ដឹកនាំក្រុមហ៊ុន GBS Cambodia ក្រុមហ៊ុន HSC Group មន្ត្រីជំនាញ និងសិក្ខាកាមមកពីវិស័យឯកជន ព្រមទាំងម្ចាស់អាជីវកម្មហាងកាហ្វេ សរុបប្រមាណ ១៥ នាក់។
វគ្គបណ្តុះបណ្តាលនេះត្រូវបានបែងចែកជា ២ វគ្គ ដោយមានសិក្ខាកាមសរុបចំនួន ២០ នាក់ (១០ នាក់ក្នុងមួយវគ្គ)៖
១. វគ្គទី១៖ ចាប់ពីថ្ងៃទី១៩-២០ ខែកុម្ភៈ ឆ្នាំ២០២៦។
២. វគ្គទី២៖ ចាប់ពីថ្ងៃទី២៣-២៤ ខែកុម្ភៈ ឆ្នាំ២០២៦។
មជ្ឈមណ្ឌលបណ្តុះបណ្តាល B-HUB Barista Training Center គឺជាអង្គភាពចំណុះក្រុមហ៊ុន Gourmet Beverage Solutions (GBS) ដែលមានរចនាសម្ព័ន្ធគ្រប់គ្រង និងគ្រូឧទ្ទេសស្របតាមស្តង់ដារកំណត់ដោយក្រសួងទេសចរណ៍។ មជ្ឈមណ្ឌលមានសម្បទានរឹងគ្រប់គ្រាន់ រួមមានអគារសិក្សា បន្ទប់ទ្រឹស្តី និងបន្ទប់អនុវត្តផ្ទាល់ដែលបំពាក់ដោយសម្ភារបរិក្ខារទំនើប និងសម្ភារឧបទេសពេញលេញ។ កម្មវិធីសិក្សាត្រូវបានរៀបចំឡើងដើម្បីផ្ដល់ចំណេះដឹង ជំនាញ និងឥរិយាបថវិជ្ជាជីវៈ តាមរយៈវគ្គសិក្សាចំនួន ៥ រួមមាន៖ (១) ថ្នាក់ឆុងកាហ្វេកម្រិតដំបូង (២) ថ្នាក់កម្រិតមធ្យម (៣) ថ្នាក់កម្រិតឌីប្លូម (៤) ថ្នាក់បង្កើតរូបមន្តភេសជ្ជៈ និង (៥) ថ្នាក់សិល្បៈឡាតតេ (Latte Art)។
ក្រសួងទេសចរណ៍បានផ្ដល់ការគាំទ្រយ៉ាងពេញទំហឹងដល់មជ្ឈមណ្ឌល B-Hub ក្នុងការអភិវឌ្ឍធនធានមនុស្សក្នុងវិស័យទេសចរណ៍ ក្នុងគោលបំណងលើកកម្ពស់សមត្ថភាព បង្កើនឱកាសការងារក្នុងផ្នែកសេវាកម្មម្ហូបអាហារ និងភេសជ្ជៈ ព្រមទាំងពង្រីកកិច្ចសហការលើការវាយតម្លៃសមត្ថភាពអ្នកជំនាញ និងការរៀបចំការប្រកួតប្រជែងជំនាញឆុងកាហ្វេថ្នាក់ជាតិក្នុងពេលអនាគត។
