ខេត្តសៀមរាប៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍ បានអញ្ជើញជាអធិបតីក្នុងពិធីបើក «វេទិកាផ្គូផ្គងឱកាសការងារក្នុងវិស័យទេសចរណ៍ ឆ្នាំ២០២៦» ព្រមទាំងប្រគល់វិញ្ញាបនបត្រជូនសិក្ខាកាមជ័យលាភី នៃវគ្គបណ្តុះបណ្តាលគ្រូបង្គោលជាតិ និងអ្នកវាយតម្លៃបង្គោលជាតិនៃសេវាកម្មសណ្ឋាគារ និងវគ្គបណ្តុះបណ្តាលជំនាញស្ប៉ា និងសុខុមាលភាព។
ពិធីដ៏សែនមនោរម្យនេះ មានការអញ្ជើញចូលរួមពីឯកឧត្តម ង៉ូវ សេងកាក់ អភិបាលរងនៃគណៈអភិបាលខេត្តសៀមរាប តំណាងរដ្ឋបាលខេត្តសៀមរាប និងលោក François Schnoebelen នាយកសាលាសណ្ឋាគារ និងទេសចរណ៍ ប៉ូលឌុយប្រ៊ូល ថ្នាក់ដឹកនាំក្រសួង-ស្ថាប័នពាក់ព័ន្ធ តំណាងមូលនិធិអភិវឌ្ឍន៍ជំនាញ (SDF) ទីភ្នាក់ងារជាតិមុខរបរ និងការងារ ប្រតិបត្តិករទេសចរណ៍ សមាគមទេសចរណ៍ គ្រឹះស្ថានបណ្តុះបណ្តាល សិក្ខាកាម និងអ្នកស្វែងរកការងារប្រមាណ ៤០០នាក់ នៅសាលាសណ្ឋាគារ និងទេសចរណ៍ ប៉ូលឌុយប្រ៊ូល ខេត្តសៀមរាប។
ថ្លែងក្នុងឱកាសនេះ ឯកឧត្តមរដ្ឋមន្ត្រី បានសម្តែងនូវការកោតសរសើរ និងថ្លែងអំណរគុណចំពោះក្រសួង ស្ថាប័នពាក់ព័ន្ធ ដៃគូអភិវឌ្ឍ ដៃគូសហការ សមាគមទេសចរណ៍ គ្រឹះស្ថានបណ្តុះបណ្តាល និងប្រតិបត្តិករវិស័យឯកជន ដែលបានសហការរៀបចំវេទិកានេះ ក៏ដូចជាចូលរួមក្នុងការបណ្តុះបណ្តាល និងអភិវឌ្ឍធនធានមនុស្សក្នុងវិស័យទេសចរណ៍ ព្រមទាំងថ្លែងអំណរគុណដល់និយោជកទាំងអស់ ដែលបាននាំយកឱកាសការងារ និងកម្មសិក្សាមកផ្តល់ជូនយុវជនកម្ពុជា ដោយវេទិកានេះមានការចូលរួមពីក្រុមហ៊ុនជាង១០០ នាំមកនូវឱកាសការងារជាង៥០០០កន្លែង និងរំពឹងថានឹងមានអ្នកស្វែងរកការងារប្រមាណ៣០០០នាក់ ចូលរួមដាក់ពាក្យ និងសម្ភាសន៍ការងារដោយផ្ទាល់។
ជាមួយគ្នានេះដែរ ឯកឧត្តមរដ្ឋមន្ត្រី បានគូសបញ្ជាក់ថា វេទិកាផ្គូផ្គងឱកាសការងារក្នុងវិស័យទេសចរណ៍ ដែលត្រូវបានរៀបចំឡើងជាលើកដំបូងនេះ មានសារៈសំខាន់ក្នុងការផ្សារភ្ជាប់ការបណ្តុះបណ្តាលជំនាញវិជ្ជាជីវៈទៅនឹងតម្រូវការជាក់ស្តែងនៃទីផ្សារការងារ ព្រមទាំងបង្កើតឱកាសឱ្យអ្នកស្វែងរកការងារបានជួប និងភ្ជាប់ទំនាក់ទំនងដោយផ្ទាល់ជាមួយនិយោជក ដើម្បីទទួលបានឱកាសការងារសមស្របតាមជំនាញ និងសមត្ថភាពរបស់ខ្លួន ដែលការអភិវឌ្ឍជំនាញមិនគួរបញ្ចប់ត្រឹមវគ្គបណ្តុះបណ្តាលនោះទេ ប៉ុន្តែត្រូវជំរុញវប្បធម៌នៃការសិក្សាពេញមួយជីវិត និងការបណ្តុះបណ្តាលបន្ថែម ដើម្បីឱ្យអ្នកជំនាញអាចបន្តពង្រឹងសមត្ថភាពស្របតាមការវិវត្តនៃឧស្សាហកម្មទេសចរណ៍។
ទន្ទឹមនឹងនេះ ឯកឧត្តមរដ្ឋមន្ត្រី ក៏បានសង្កត់ធ្ងន់ថា ការអភិវឌ្ឍធនធានមនុស្ស គឺជាអាទិភាពសំខាន់ក្នុងការលើកកម្ពស់គុណភាពវិស័យទេសចរណ៍ ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល ដែលបានកំណត់ «មនុស្ស» ជាអាទិភាពទី១ ដើម្បីកសាងធនធានមនុស្សប្រកបដោយជំនាញ សមត្ថភាពប្រកួតប្រជែង សីលធម៌ និងគុណធម៌ នាពេលឥឡូវនេះក្រសួងទេសចរណ៍កំពុងជំរុញការភ្ជាប់កម្មវិធីបណ្តុះបណ្តាល HoKa ទៅនឹងក្របខ័ណ្ឌគុណវុឌ្ឍិជាតិកម្ពុជា ដើម្បីឱ្យជំនាញ និងបទពិសោធការងារទទួលបានការទទួលស្គាល់ជាផ្លូវការ និងបង្កើតគន្លងអាជីពកាន់តែច្បាស់លាស់។
បន្ថែមពីលើនេះ ឯកឧត្តមរដ្ឋមន្ត្រី ក៏បានផ្តល់អនុសាសន៍ដល់គ្រប់ភាគីពាក់ព័ន្ធ ឱ្យបន្តពង្រឹងកិច្ចសហការលើការបណ្តុះបណ្តាល និងអភិវឌ្ឍជំនាញវិជ្ជាជីវៈ ពង្រីកវេទិកាផ្គូផ្គងឱកាសការងារទៅកាន់តំបន់ទេសចរណ៍សំខាន់ៗផ្សេងទៀត ដូចជា រាជធានីភ្នំពេញ និងតំបន់ឆ្នេរសមុទ្រ ព្រមទាំងជំរុញការប្រើប្រាស់ប្រព័ន្ធចុះបញ្ជីអ្នកជំនាញទេសចរណ៍ (CTPRS) សម្រាប់ការសិក្សា ការគ្រប់គ្រងការបណ្តុះបណ្តាល និងការស្វែងរកឱកាសការងារសមស្រប។ ជាពិសេស ជំរុញការវាយតម្លៃសមត្ថភាពតាមរយៈយន្តការវាយតម្លៃការសិក្សាពីមុន (RPL) ដើម្បីឱ្យអ្នកជំនាញទទួលបានគុណវុឌ្ឍិស្របតាមស្តង់ដាជាតិ និងអាស៊ាន។
សូមជម្រាបជូនថា សាលាសណ្ឋាគារ និងទេសចរណ៍ ប៉ូលឌុយប្រ៊ូល ខេត្តសៀមរាប បានចូលរួមក្នុងការបណ្តុះបណ្តាល និងអភិវឌ្ឍធនធានមនុស្សក្នុងវិស័យទេសចរណ៍នៅកម្ពុជាចាប់តាំងពីឆ្នាំ២០០២ ដោយសហការជាមួយក្រសួងទេសចរណ៍ និងបណ្តុះបណ្តាលធនធានមនុស្សស្របតាមស្តង់ដាអាស៊ាន ដែលគិតមកដល់បច្ចុប្បន្ន បានបណ្តុះបណ្តាលអ្នកជំនាញទេសចរណ៍ជាង៦ ០០០នាក់។
ខេត្តសៀមរាប, ព្រឹកថ្ងៃទី៣០ ខែតុលា ឆ្នាំ២០២៦
