គណៈកម្មការគ្រប់គ្រងគម្រោង ហូកា នៃក្រសួងទេសចរណ៍ បានសហការជាមួយអង្គការស្វីសខន់ថាក់ បានរៀបចំវគ្គបណ្តុះបណ្តាលអ្នកវាយតម្លៃជាតិបដិសណ្ឋារកិច្ចកម្ពុជា (ហូកា) ជំនាញការិយាល័យជួរមុខ និងគេហកិច្ច ដល់មន្រ្តីក្រសួងទេសចរណ៍ មន្ទីរទេសចរណ៍ខេត្តគោលដៅទាំង១២ បុគ្គលិកអង្គការតុកកែញញឹមកម្ពុជា និង អានីកផាលេស ជាសិក្ខាកាមចំនួន ២៥រូប (ស្រី ១២នាក់) ក្នុងគោលបំណងធ្វើការបណ្តុះបណ្តាលធនធានអ្នកវាយតម្លៃជាតិបដិសណ្ឋារកិច្ចកម្ពុជា (ហូកា) ជំនាញការិយាល័យជួរមុខ និងគេហកិច្ច ដោយធ្វើការបំពាក់បំប៉នចំណេះដឹងថ្មីៗ និងជំនាញបន្ថែម ដើម្បីចូលរួមចំណែកក្នុងការកសាងធនធានអ្នកវាយតម្លៃលើជំនាញការិយាល័យជួរមុខ និងគេហកិច្ច នៅតាមខេត្តគោលដៅរបស់អ្នកវាយតម្លៃជាតិបដិសណ្ឋារកិច្ចកម្ពុជា (ហូកា) សំដៅរួមចំណែកកសាងធនធនមនុស្សក្នុងវិស័យទេសចរណ៍ ឱ្យឆ្លើយតបទៅនឹងតម្រូវការ និងជាពិសេសលើកកម្ពស់តម្លៃជំនាញវិជ្ជាជីវៈទេសចរណ៍។
ក្នុងរយៈពេល ២ថ្ងៃនេះ សិក្ខាកាមទាំងអស់ទទួលបានចំណេះដឹង និងជំនាញលើខឹ្លមសារសំខាន់៖ ១. ប្រព័ន្ធអប់រំជាតិកម្ពុជា ២. លទ្ធផលសិក្សា និងការទទួលស្គាល់តាមប្រព័ន្ធអប់រំចំណេះដឹងទូទៅ និងបណ្តុះបណ្តាលវិជ្ជាជីវៈ ៣. ក្របខណ្ឌគុណវុឌ្ឍិជាតិកម្ពុជា ៤. ក្របខណ្ឌគុណវុឌ្ឍិអាស៊ាន ៥. សមត្ថភាព ៦. ការបណ្តុះបណ្តាលផ្អែកសមត្ថភាព ៧. ការវាយតម្លៃផ្អែកសមត្ថភាព ៨. តួនាទី និងទំនួលខុសត្រូវរបស់អ្នកវាយតម្លៃជាតិបដិសណ្ឋារកិច្ចកម្ពុជា (ហូកា) ៩. ការវាយតម្លៃសមត្ថភាពប្រកបដោយប្រសិទ្ធភាព (HISA)។
គួរបញ្ជាក់ផងដែរថា ត្រឹមឆ្នាំ២០២៥ គណៈកម្មការគ្រប់គ្រងគម្រោង ហូកា នៃក្រសួងទេសចរណ៍ បានធ្វើការបណ្តុះបណ្តាលយុវជនក្រីក្រងាយរងគ្រោះ អ្នកជំនាញទេសចរណ៍ អ្នកគ្រប់គ្រង ម្ចាស់អាជីវកម្មទេសចរណ៍ គ្រូបង្គោល និងអ្នកវាយតម្លៃបង្គោលសរុបចំនួន ៨ ៨១១នាក់ នៅតាមខេត្តគោលដៅគម្រោងទាំង១២ និងតាមបណ្តាលខេត្តមួយចំនួនទៀត។
